Nga Mark Brunga
Tashmë, bunkeri, përveçse me pamje militare, origjinal për qëllimet për të cilat është ndërtuar; me pamje hauri lopësh, siç u degdis vitet e tranzicionit; me pamje artistike, siç e kemi në krah të Kryesisë së Kuvendit; me pamje të kallur prej flakëve e tymit, siç u katandis ai në krah të Ministrisë së Rendit, i cili dhe ai është nisur për të qenë bunker artistik; kemi pra dhe një bunker plot dobi, prej së cilit del jetë, sepse pa ta jeta nuk vazhdon dot; dhe ky është një bunker në zonën e Maminasit, tek i cili janë instaluar tubacionet për të shpërndarë ujin e pijshëm në lagjet e fshatit.
Ngjitur me stacionin e pompimit, nga ky bunker artilerie. tashmë në vend të topave të mëdhenj dhe predhave që priteshin për të dalë, duken tubacionet e ujrave që pa zhurmë shpërndajnë ujra të freskëta. Dhe kjo relike gjigande e Luftës së Ftohtë, tashmë ka zënë vend si një monument paqësor, që ruan edhe vlerat e luftës së ftohtë. Një zgjidhje inteligjente dhe mjaft praktike. 
Zona Durrësit është ndër zonat që ka patur një numër shumë të madh bunkerësh. Aty përfshihet dhe Maminasi, duke qënë se konsiderohej një rajon strategjik në periudhën e Luftës së Ftohtë, ngaqë mbronte Tiranën dhe Rinasin.
Bunkeri për të cilin po shkruajmë, ishin të llojit që llojit që shërbenin si pozicione zjarri për topat e rëndë me kalibër 85, 100 dhe 122 mm. Bunkerë të tillë kishin një diameter 10 m, dhe me lartësi 4.5 m.
Durrësi ka qënë nga zonat më të militarizuara dhe, duke qënë një vijë e rajonit të parë me shumë sipërfaqe bregdetare, ai ka pasur edhe nje pjesë te madhe ” racionimi” të bunkerizimit.
Nga dy brigada të mbrojtjes bregdetare që përbënin edhe forcën e parë në skalionin e parë të mbrojtjes, u montuan afro 5600 bunkerë . Ndërkohë, kanë qënë edhe dy brigada këmbësorie të skalionit të dytë të cilat kanë bërë montimin e 3600 të tjerëve, dhe e gjithë shumatorja e bunkerëve arrin me përafërsi në 18 400 copë. /tesheshi.com/
