Pikaset një tjetër avion me drogë që po shkonte drejt Italisë. Policia shqiptare dhe ajo italianë bëjnë të ditur një avion i vogël po fluturonte mbi qiellin e rajonit të Pulias në Itali.
Nga baza ushtarake ajrore e Gioia del Colle, në jug të Italisë janë ngritur menjëherë dy avionë Eurofighter të cilët e kanë ndjekur avionin e vogël duke e shoqëruar deri jashtë kufirit ajor italian. Më pas janë humbur gjurmët e destinacionit të tij.
Sistemi i sigurimit ajror italian dyshon se në bordin e këtij avioni udhëtonin trafikantë droge me ngarkesë lënde narkotike.
Supozohet se ngarkesa me drogë do të hidhej nga ajri e se bashkëpunëtorë të tjerë të trafikantëve do ta prisnin drogën në tokën italiane.
Menjëherë pas kësaj, ky informacion është konfirmuar nga policia e shtetit.
Sipas policisë “në orët e para të mengjesit të datës 20 mars 2016 nga Policia e Shtetit është marrë informacion në rrugë operative se në zonën e fushave të fshatit Akërni, po lëviz në hapësirën ajrore, një avion i vogël”.
Policia e Shtetit ka njoftuar mënjehërë Policinë Italiane, me qëllim ndjekjen e përbashkët të këtij informacioni.
Në bashkëpunim me homologët italianë, u punua intensivisht, për verifikimin e këtij informacioni, duke zhvilluar veprime të koordinuara në Vlorë dhe në një pjesë të territorit italian.
Policia e Shtetit ka shoqëruar shtetasit N.M., A.M., K.M., si të dyshuar në lidhje me këtë veprimtari, si edhe automjetet një fuoristradë dhe një furgon në pronësi të këtyre shtetasve, të cilat po këqyren nga specialistët e Policisë.
Policia e Shtetit po bashkëpunon edhe me Prokurorinë për Krime të Rënda Tiranë, dhe ka bërë regjistrimin e Procedimit Penal per vepren penale “Trafikim të lëndëve narkotike” të kryer në bashkëpunim.
Veprimtaria hetimore është në vijim edhe nga homologët e policisë italiane për zbulimin e autorëve të implikuar në këtë veprimtari kriminale.
/tesheshi.com/
