Trupi i tij i ndryshkur është i mbuluar me myshk dhe liken dhe pronari e lau për herë të fundit në vitin 1977. Por ky Opel Olympia ende funksionon dhe është bërë një atraksion në Berlin.
Profesori në pension Hanns-Lüdecke Rodewald në fakt ka eksperimentuar me makinën e tij të vjetër të vitit 1956 për gati gjysmë shekulli.
“Dua të shoh se çfarë do të ndodhë me makinën time nëse nuk e prek për dekada dhe punoj shumë pak në të”, thotë Rodewald.
Makina ka qenë prej kohësh një gjemb në këmbë për forcat e rendit dhe autoriteteve. “Policia e konfiskoi me forcë në vitin 1995, por ata e humbën (rastin) dhe duhej ta riregjistronin dhe të më paguanin dëmshpërblim”, kujton profesori.
“Autoritetet e shpallën makinën ‘mbeturinë’ dhe më akuzuan tre herë për shkelje të ligjit për asgjësimin e mbetjeve”. Por Rodewald arriti të vendoste drejtësi çdo herë.
Opeli edhe pse duket i mykur, është i regjistruar, i nënshtrohet kontrollit teknik dhe është në gjendje drejtimi. Meqenëse Rodewald e drejton rrallë, duhet pak përpjekje për ta ndezur – dhe me pak benzinë drejt e në karburator motori uturon si një makinë qepëse e vjetër.
Ndaj, pronari është pak i frikësuar para çdo kontrolli teknik.
“Makina nuk duket shumë e bukur dhe gjithmonë ka disa të meta teknike që duhen anashkaluar”, thotë Rodewald. “Nuk ka as rripa sigurie, as airbag, as dritat e pasme dhe të mjegullës. Por inxhinierëve të sotëm shpesh u pëlqen ta inspektojnë dhe pyesin veten pse nuk ka nevojë për to”, shkruan DPA. /tesheshi.com/
