Ministri i jashtëm i Katarit, Sheik Mohamed bin Abdulrahman Al Thani, tha se një goditje e madhe në marrëdhëniet midis vendeve të Gjirit ka shkaktuar një krizë në rajon, duke theksuar se Doha mbetet e gatshme për dialog.
Duke iu drejtuar Komisionit për Punë të Jashtme të Parlamentit Evropian, Zëvendëskryeministri dhe Ministri i Punëve të Jashtme të Katarit zbuloi se vendi i tij kishte filluar bisedimet me Arabinë Saudite për krizën e Gjirit, por që Riadi i pezulloi ato në janar pa asnjë paralajmërim.
Ai tha se Arabia Saudite papritmas kishte ndalur negociatat për krizën e Gjirit pa asnjë arsyetim, duke shprehur shpresën se Kuvajti do të vazhdojë përpjekjet e tij të ndërmjetësimit për t’i dhënë fund krizës.
Një marrëveshje e detyrueshme e sigurisë për rajonin
Al Thani përsëriti thirrjen e tij për një marrëveshje të detyrueshme rajonale të sigurisë në Lindjen e Mesme për të luftuar kërcënimet e sigurisë.
Qëllimi i marrëveshjes është të eliminojë shqetësimet rajonale dhe ndërkombëtare, tha ai.
Ai shpjegoi se marrëveshja duhet të bazohet në programe të përbashkëta dhe bashkëpunim të sigurisë, që përfshin shkëmbimin e inteligjencës dhe mosndërhyrje në punët e brendshme të shteteve.
Në lidhje me çështjen e Libisë, ai riafirmoi që Doha mbështet Qeverinë e Unitetit Kombëtar si një autoritet legjitim në Libi, e njohur nga bashkësia ndërkombëtare dhe Kombet e Bashkuara, duke theksuar se kriza në atë vend duhet të zgjidhet politikisht, jo ushtarakisht.
Ai tha që Katari dënon aktivitetet ushtarake të gjeneralit në pension, Khalifa Haftar.
“Ne i kemi bërë thirrje komunitetit ndërkombëtar që të punojë për armëpushimin në Libi dhe të gjejë një zgjidhje politike. Ne kemi parë përpjekjet e bashkësisë ndërkombëtare në muajt e fundit për të vendosur një armëpushim. Në të njëjtën kohë, ne kemi parë se cila palë nuk respekton asnjë prej këtyre përpjekjeve, qoftë negociatat në Berlin ose Moskë “, tha Al Thani.
Për një marrëveshje të drejtë palestinez-izraelite
Sa i përket planit amerikan për paqen në Lindjen e Mesme, ministri i jashtëm i Katarit tha që vendi i tij mirëpriti të gjitha nismat për të zgjidhur konfliktin palestinezo-izraelit, por vetëm me kushtin që nismat e paqes të përputhen me legjitimitetin ndërkombëtar.
“Ne kemi folur me administratën amerikane dhe po inkurajojmë negociata të drejtpërdrejta midis palestinezëve dhe izraelitëve dhe shpresojmë për paqen midis dy palëve. Sidoqoftë, nuk duhet të lëmë pas dore faktin që shtetet arabe kanë rënë dakord më parë me iniciativën arabe të paqes, e cila sipas mendimit tonë vendos një bazë të drejtë për negociatat midis palestinezëve dhe izraelitëve”, tha Al Thani. /tesheshi.com/
