Nga Bekim Laci
Liria e mediave në Maqedoni është seriozisht e rrezikuar dhe kjo gjë shpeshherë i përsëritet Maqedonisë në raportet e KE-së dhe organizmave tjerë relevant që bëjnë matjen e lirisë së shprehjes.
Një nga konstatimet më të shpeshta është se në vend të mediave të lira Maqedonia ka media të kontrolluara që nuk i shërbejnë opinionit por vetëm interesave të partive në pushtet dhe pronarëve të tyre, që nga ana tjetër ka ndikuar dukshëm në humbjen e besimit te lexuesi, i cili alternativën e informimit të saktë e kërkon te rrjetet sociale.
Këtë më së miri e pasqyron edhe anketa e fundit e IRI-t, në të cilën të anketuarit si burim kredibil te marjes së informacionit kanë zgjedhur rrjetin social Facebook.
Sociologu Ali Pajaziti, duke komentuar këtë fenomen për portalin tesheshi.com tha se njeriu parapëlqen facebookun sepse është një realitet i formuar nga vetë ai:”Fakti statistikor se përqindja më e lartë e qytetarëve në Maqedoni lajmet rreth politikës i marrin nga FB-ja tregon se njerëzit nuk besojnë në mediat si shtetërore ashtu edhe private. Ata facebook-un e quajnë si një realitet të formuar nga vetë ata, e jo nga urdhërdhënësit e politikës dhe nga gazetaria e ndikuar nga shefat që mbrojnë interesat e veta apo të ndonjë tajkuni të caktuar.
Një element tjetër me ndikim është dhe ai se qytetarët kërkojnë freskinë, jashtëkornizën, vetëprodhimin e lajmeve dhe shkrimeve”, thotë Pajaziti.
Komunikologu Sefer Tahiri për rezultatet e IRI-t thotë se reflektojnë realitetin e ri mediatik, që është trend në botë, por edhe tek ne, ndërsa për facebook-un thotë se po bëhet mjet shumë i rëndësishëm komunikativ edhe pse siç shton, politika shqiptare shfaq shenja të censurës dhe kontrollit sistematik të mendimeve dhe kritikave qytetare që shfaqen në facebook: “Që qytetarët kalojnë shumë kohë në rrjetet sociale kjo tashmë dihet; dhe mediat sociale tashmë po konkurrojnë hapur mediat tradicionale sidomos shtypin dhe radion, ndërsa kohëve të fundit edhe televizionin. Andaj ky sondazh tregon qartë se mediat tradicionale duhet ta ndezin alarmin, të krijojnë strategji se si të mbijetojnë faktin që facebook-u grumbullon publik të panumërt, gjithnjë e më shumë me ndikim dhe sipas të gjitha gjasave në të ardhmen politikanët që do ta fitojnë “luftën” në arenën e komunikimit publik, sidomos në rrjetet sociale, do ta fitojnë edhe “luftën” reale politike në zgjedhje”, thotë Komunikologu Tahiri.
Rezultatin e anketës së IRI-t, gazetari Arben Zeqiri e arsyeton me faktin se Facebook nuk ka një padron që do të mvaret nga një lider partiak, ndërsa ka buxhet më të madh se çdo parti politike në botë: “Përveç kësaj facebook është një udhëkryq ku i takon të gjitha mendimet për një ngjarje të caktuar, ashtu siç prezentohen nga vetë palët dhe në fund je ti ai që vendos mbi të vërtetën. Nisur nga kjo, si çdo kush edhe unë shfrytëzoj Facebook-un për të shprehur mendimet e mia si dhe për të kundërshtuar, komentuar ose mbështetur mendimet e tjera”, thotë Zeqiri, sipas të cilit ka edhe të atillë që nuk janë të vetëdijshëm për ndikimin e Facebook-ut.
“Madje edhe ata që ia dijnë vlerën nuk ja dijnë mjeshtrinë”, përfundon ai, duke përkujtuar se një nga shtyllat kryesorë të fitores së presidentit Barack Obama ishte Facebook. /tesheshi.com/
