Presidenti serb Aleksandar Vuçiç tha se qytetarët serbë nuk duhet të shqetësohen për sanksione të mundshme amerikane të spekuluara nga media për blerjen e armëve ruse, duke thënë se do të zgjidhë mosmarrëveshjet e mundshme me partnerët amerikanë.
“Kur Shtetet e Bashkuara marrin vendime në lidhje me sanksionet – jo ato të lehta – ato i imponojnë një kompani apo një individi, jo njerëz”, tha Vuçiç në Gjenevë, ku ai merr pjesë në një takim të Dialogut Strategjik për Ballkanin Perëndimor.
Vuçiç tha se disa në Serbi po përhapin histori të tilla për të sjellë një dozë pasigurie dhe frike, dhe theksoi se “Serbia ka një politikë të përgjegjshme”, me qëllim që të shmangë “çdo lloj problemi”.
Ai është i bindur se ai do të arrijë të zgjidhë çdo mosmarrëveshje të mundshme me partnerët amerikanë “siç ka ndodhur deri më tani”.
Media në Beograd dhe rajon njoftuan se një zyrtar i Departamentit të Shtetit të SHB.-së, Thomas Zarzecki, vjen të premten në Serbi, duke udhëhequr një task forcë të ngarkuar me zbatimin e sanksioneve mbi sektorin e sigurisë ruse, kompanitë dhe vendet që kanë bashkëpunim ushtarak me Rusinë.
Mediat cituan blerjen e armëve ruse si një problem të mundshëm nga Serbia, dhe lajmet erdhën pasi u njoftua se Serbia ishte duke përvetësuar sistemin Pancir nga Rusia, një sistem i kombinuar i raketave tokë-ajër me rreze të shkurtër.
E nga ana tjetër, i dërguari special i SHBA për Ballkanin Perëndimor Mattheë Palmer, theksoi gjatë një vizite të fundit në rajon, shqetësimet në lidhje me prirjen e Serbisë për të marrë armë ruse.
“Sigurisht që jemi të shqetësuar, jo vetëm me vendosjen e pajisjeve ushtarake ruse, por edhe për mundësinë që Serbia të përvetësojë sisteme të mëdha ushtarake ruse”, tha Palmer. /tesheshi.com/
