Maroku ka njoftuar ndërtimin e një stadiumi spektakolar, i cili do të jetë i dyti më i madhi në botë dhe më i madhi në Afrikë.
Synimi i marokenëve është të presin finalet e Kupës së Botës 2030, të cilat i synon së bashku me Spanjën dhe Portugalinë.
Tani për tani, pritet që finalja të jetë në “Santiago Bernabeu”-un e rinovuar, por Maroku do të përpiqet t’i prishë këto plane.
Stadiumi do të ndërtohet në Benslimane, pranë qytetit më të madh maroken të Casablanca-s.
Ai do të mund të mbajë 113 mijë spektatorë, ndërsa punimet do të nisin në vitin 2025 dhe duhet të përfundojnë në vitin 2028. Vlerësohet se punimet do të kushtojnë rreth gjysmë miliardë dollarë (rreth 470 milionë euro).
Po kështu, marokenët planifikojnë të rindërtojnë stadiumet në Tangier, Rabat, Agadir, Marrakesh dhe Fez, ku pas dy vitesh do të luhen ndeshjet e Kupës së Kombeve të Afrikës. Qeveria marokene ka përgatitur deri në një miliard e 300 milionë euro për të investuar në stadiume deri në Kupën e Botës në shtatë vjet. /tesheshi.com/
