Agjencia Kundër Mashtrimit e Bashkimit Evropian (OLAF) ka akuzuar Marine Le Pen dhe disa anëtarë të partisë së saj, përfshirë babanë e saj, për përvetësim të rreth 620 mijë eurove gjatë kohës që ishin anëtarë të Parlamentit Evropian.
Faqja kërkimore franceze Mediapart publikoi një pjesë të një raporti të ri 116 faqesh ku thuhet se eurodeputetët kanë keqpërdorur fondet e BE-së për qëllime partiake kombëtare.
Akuzat u bënë një javë para raundit të dytë të zgjedhjeve presidenciale, që do të mbahen më 24 prill, në të cilat Le Pen do të përballet me presidentin aktual Emmanuel Macron.
Prokuroria në Paris ka konfirmuar se është duke studiuar raportin që ka marrë nga OLAF më 11 mars, raporton Reuters.
Faqja kërkimore Mediapart njoftoi se raporti i OLAF pretendon se Le Pen ka përvetësuar 140,000 euro para publike.
Askush nuk është akuzuar se ka përfituar drejtpërdrejt, por se ka kërkuar fonde nga BE për shpenzimet e stafit dhe organizimin e eventeve.
“Francezët nuk do të mashtrohen nga përpjekjet e BE-së dhe institucioneve evropiane… për të ndërhyrë në fushatën presidenciale dhe për të dëmtuar Marine Le Pen”, tha presidenti i Asamblesë Kombëtare Jordan Bardella për Radio Europa 1.
Ai tha se partia e tij kishte ngritur dy padi kundër OLAF dhe do të ngrejë një të tretën, në përgjigje të raportit.
Duke folur për BFM TV, Rodolphe Bosselut, një avokat i Marine Le Pen, tha se klientja e saj i mohoi akuzat. /tesheshi.com/
