Kardinali Karol Wojtyła, i cili do të zgjidhej Papë në vitin 1978 me emrin Gjon Pali II, ishte në dijeni të rasteve të abuzimit të fëmijëve në Kishën Katolike Romake në Poloni, sipas një investigimi gazetaresk të paraqitur sot nga kanali televiziv privat TVN.
Gjatë kohës së tij si kardinal dhe peshkop i Krakovit, Karol Wojtyła dinte për shkeljet e kryera nga priftërinjtë e asaj dioqeze dhe i zhvendosi ata nga një famulli në tjetrën për të shmangur skandalin, sipas kreut të hetimit, Michal Gutowski.
Një nga priftërinjtë u dërgua nga Papa i ardhshëm në Austri. Kardinali Wojtyła i shkroi gjithashtu një letër rekomandimi, drejtuar kardinalit të atëhershëm të Vjenës, Franz König, pa e informuar megjithatë për akuzat kundër priftit.
Si pjesë e hetimit, Gutowski u takua me viktimat e priftërinjve fëmijë-dashës, të afërmit e tyre dhe ish-punonjësit e dioqezës. Ai citon gjithashtu dokumente nga policia sekrete e ish-SB të Polonisë komuniste dhe tekstet e pakta të Kishës që ai ka mundur t’u qaset. Gazetari tha se dioqeza e Krakovit refuzoi t’i lejonte atij akses në arkivat e saj.
Kisha Katolike Romake e Polonisë ka refuzuar të dorëzojë dokumente në të kaluarën, madje edhe autoriteteve gjyqësore ose një komisioni publik që heton rastet e abuzimit të fëmijëve.
Një dëshmitar që kërkoi të mbetej anonim konfirmoi se ai ia kishte raportuar personalisht veprimet e një prifti kardinalit Wojtyla në vitin 1973. “Wojtyla para së gjithash donte të sigurohej që nuk ishte një mashtrim. Ai më kërkoi të mos e them askund tjetër dhe tha se do të kujdesej vetë për këtë”, tha burri, duke shtuar se kardinali e pyeti konkretisht nëse mund ta mbulonin këtë çështje.
“Ajo që zbuluat është revolucionare sepse vërteton atë që shumë njerëz kanë dyshuar për vite me radhë, se Gjon Pali II e dinte që ky problem ekzistonte para se të bëhej Papë,” tha Thomas Doyle, një ish-prift katolik. Ekspert i ligjit kanunor dhe autor i një prej raportet e para për krimet e priftërinjve katolikë në SHBA. “Ai duhej ta dinte, por nuk kishte asnjë provë. Dhe ja ku e kemi dëshminë”, ka theksuar ai.
Një libër me akuza të ngjashme kundër Karol Wojtyła-s pritet të botohet brenda javës në Poloni. Është rezultat i një investigimi të gazetarit holandez Eke Overbeek dhe titullohet “Maxima Culpa – Gjon Pali II e dinte”. /tesheshi.com/
