Disa zyrtarë të Kishës së Anglisë, duke përfshirë një ish-peshkop të Canterbury-t, po përballen me masa disiplinore për përfshirjen e tyre në një nga skandalet më të këqija të pedofilisë brenda kishës.
Nëntorin e kaluar, një hetim arriti në përfundimin se Kisha e Anglisë fshehu një seri sulmesh dhe abuzimesh seksuale që datojnë që nga vitet 1970 dhe çështja çoi në dorëheqjen e primatit Justin Welby.
Sipas raportit, Welby “duhet dhe mund” të kishte raportuar tek autoritetet në vitin 2013, kur ai u bë i vetëdijshëm për sulmet seksuale të kryera gjatë dekadave nga një avokat i lidhur me Kishën e Anglisë, John Smith. Avokati, i cili tani është i vdekur, dyshohet se sulmoi më shumë se 130 fëmijë.
Sot, grupi që ka ndërmarrë politikën e mbrojtjes brenda Kishës, ka publikuar emrat e dhjetë priftërinjve të tjerë, ndaj të cilëve do të kërkojë “fillimin e procedimit disiplinor” për të njëjtin rast. Midis tyre është George Carey, Kryepeshkop i Canterbury-t midis viteve 1991-2002, i cili ishte në dijeni të veprimeve të John Smith dhe kishte marrë një kopje të një raporti për këtë çështje, të cilin ai “e mohon ta ketë parë ndonjëherë”.
Carey, 89 vjeç, dha dorëheqjen nga priftëria në dhjetor, pasi një tjetër hetim u bë publik që e qortoi për dështimin për të informuar policinë se një peshkop ishte akuzuar për abuzim seksual gjatë kohës që ishte kryepeshkop.
Tridhjetë anëtarë të tjerë të Kishës së Anglisë nuk do të përballen me masa disiplinore sepse nuk ka “prova të mjaftueshme” për përfshirjen e tyre.
John Smith vdiq në vitin 2018, pa u arrestuar apo akuzuar për asgjë. “Ai ishte padyshim autori serial më aktiv i sulmeve (seksuale)” brenda Kishës së Anglisë dhe shkaktoi trauma “brutale dhe të tmerrshme” fizike, seksuale dhe psikologjike te njerëzit në Britani, Zimbabve dhe Afrikën e Jugut, përfundon raporti. /tesheshi.com/
