Ndodh shpesh që fëmijët anembanë botës të krijojnë ëndra për t’u bërë trajnerë futbolli, duke parë drejtues që ju lënë mbresë. E zakonisht, për të arritur këtë, ju duhen përgatitje 20 apo 30-vjeçare. Por ka ndodhur që një fëmijë 5 vjeç të jetë që tani asistent trajner. Bëhet fjalë për vogëlushin Carter, i cili të premten është lançuar si ndihmëstrajner i skuadrës së Aston Villa-s.
Ka qenë vetë trajneri Steve Bruce, ai që në konferencë është paraqitur bashkë me 5-vjecarin, duke e prezantuar atë si krahun e tij të djathtë.
Në fakt e gjitha ka qenë një lloj mbështetjeje që klubi i ka dhënë Carter, i cili ka humbur këmbën dhe ecën me protezë, e cila mban ngjyrat e skuadrës dhe është e firmosur nga yje të klubit si Grealish dhe McGrath. Si tifoz “i çmendur” i Aston Villa-s, ai gjithnjë i kërkonte familjes të mund ta fuste në zyrat e klubit që dashuronte.
E tashmë, 5-vjecari do të jetë një lloj “maskote” e klubit, një figurë e mirënjohur nga të gjithë, dhuratë që shoqëria që zotëron klubin, ia ka bërë, për t’i plotësuar dëshirën e fortë që kishte.
Përveç simbolikës së paraqitjes si ndihmëstrajner, Carteri i vogël mund të japë edhe ndonjë mendje për trajnerin Steve Bruce, për të mos thënë ndonjë ide brilante, pasi ai e ndjek skuadrën në çdo ndeshje. /tesheshi.com/
