Për 90 minuta u duk se mallkimi italian do të binte këtë herë mbi Realin e Madridit, në një tjetër çerekfinale të Champions League-s.
Kualifikimi spektakolar i Romës i kishte dhënë zemër Juventusit, që edhe pse kishte humbur 0-3 ndaj Realit në fushën e vet, e nisi me shumë kurajë sfidën në “Santiago Bernabeu”.
Dy golat e Mandzukic-it dhe një i Matuidi-t po e çonin ndeshjen në shtesa, kur në të 93-tën minutë gjyqtari drejton gishtin nga pika e 11-metërshit për një ndërhyrje të dyshimtë brenda zonës.
Buffon del jashtë me karton të kuq, ndërsa Cristiano Ronaldo e kthen këtë 11-metërsh në gol me një gjuajtje të përpiktë.
Rezultati 1-3 i jep të drejtë Realit të Madridit të vijojë rrugën në Champions League; Juventusi detyrohet të largohet mes pikëllimit.
Në takimin tjetër, në atë mes Bajernit të Mynihut dhe Seviljes, nuk pati gol. Barazimi 0-0 qe i mjaftueshëm për bavarezët që të shkojnë në gjysmëfinale. Fitorja 1-2 në ndeshjen e parë u dha atyre qetësinë e duhur për ta administruar 90-minutëshin e dytë.
Reali i Madridit dhe Bajerni i Mynihut u bashkohen Romës dhe Liverpulit, në pritje të shortit të së premtes. /tesheshi.com/
