Kryeministrat e Hungarisë dhe Polonisë vunë bazat e një aleance të re të konservatorëve të krahut të djathtë në Evropë në Budapest me udhëheqësin e ekstremit të djathtë italian Matteo Salvini, pa përmendur formimin e një grupi të përbashkët në Parlamentin Evropian, raportoi AFP.
Pas takimit, Viktor Orban mirëpriti “hapin e parë të një udhëtimi të gjatë të përbashkët”.
“Ne kemi rënë dakord të vazhdojmë të punojmë. Ne do të takohemi në maj, ose në Romë ose në Varshavë, dhe data varet nga pandemia e COVID-19,” tha Orban në një konferencë të përbashkët shtypi.
Matteo Salvini, udhëheqësi i LEGA-s, foli për “rrugën që po ndjek sot dhe e cila do të vazhdojë në disa faza në kryeqytete të ndryshme evropiane, me zgjerimin e grupit”.
“Ne jemi thelbi historik dhe themelor i kësaj aleance dhe qëllimi ynë është të jemi të parët në Evropë,” shtoi ai, duke premtuar “shpresë pas periudhës më të errët që nga lufta”.
Familja dhe krishterimi
Kryeministri polak Mateusz Morawiecki tha se ai do të përfaqësonte një gamë të gjerë mendimesh dhe njerëzish. Ai mbrojti “integrimin evropian që respekton sovranitetin kombëtar, familjen, Krishterimin dhe mbrojtjen e vlerave tradicionale”.
Ky ishte takimi i parë i tre udhëheqësve pasi partia e Orban-it, Fidesz-I, u largua nga Partia Popullore Evropiane (EPP).
E përbashkëta e tyre është kundërshtimi ndaj Komisionit Evropian për sundimin e ligjit dhe respektimin e të drejtës së azilit, dhe tani mosanëtarësimi në EPP, partia e parë në Parlamentin Evropian. Ndërsa 12 anëtarë të Fidesz-it janë tani të paregjistruar, Salvini dhe Morawiecki janë pjesë e dy grupeve të ndara parlamentare në Strasburg.
Menjëherë pas takimit, udhëheqësi i EPP Donald Tusk shkroi në Twitter: “Rusia po mobilizon forcat e saj rreth Ukrainës. Në Budapest, Morawiecki po organizon një bllok politik pro-Putin me Orban dhe Salvini. Nuk është një shaka e 1 prillit”. /tesheshi.com/
