Jemi mësuar të shohim më 1 maj punëtorë që dalin në rrugë për të kërkuar të drejtat e tyre, sindikata të organizuara për të dëshmuar dhe forcërisht se janë në veprim, anarkistë që shfrytëzojnë rastin për të djegur e shkatërruar ç’tu dalë përpara.
Por një pamje tjetër kanë ofruar rrugët e qyteteve suedeze ditën e djeshme, ku është protestuar për të drejtën e femrave muslimane për ta mbajtur hixhabin në punë.
Manifestimet e tilla kanë marrë shkas nga një vendim i jo shumë kohëve më parë i Gjykatës së Drejtësisë së Bashkimit Europian që i lejon kompanitë private t’ua pengojnë punonjësve të tyre mbajtjen e simboleve të dukshme fetare; një vendim që pretendohet masivisht të synojë ndalimin e mbajtjes së hixhabit në vendet e punës.
Një raportim i gjerë i Al Jazeera-s flet për protestuese në rrugët e Stokholmit e të qyteteve të tjera suedeze që kanë ngritur zërin e kanë thirrur: “Hixhabi im nuk është puna juaj”, “Punësimi është e drejta jonë”.
Një manifestuese i ka thënë Al Jazeera-s se, “Dola në rrugë sepse është e drejta ime të vesh çka dua. Më e pakta që mund të bëjë marshimi është prishja e heshtjes rreth të drejtave të punës së femrave muslimane.”
Siç është shprehur një nga organizatoret e manifestimeve, muslimanet nuk dalin zakonisht në protestë
ditën e 1 majit, por ato i ka nxitur heshtja e thellë pas vendimit të gjykatës europiane.
“Nuk pati kritikë të fortë ndaj vendimit, veçanërisht këtu në Suedi, një vend i lëvduar shumë për të drejtat e njeriut,” ka rrëfyer Maimuna Abdullahi.
“Legalizimi i diskriminimit na shtrëngon të zgjedhim mes pavarësisë sonë ekonomike dhe identitetit tonë fetar,” i është deklaruar Al Jazeera-s nga e njëjta veprimtare.
Sipas një studimi të fundit të Rrjetit Europian Kundër Racizmit (ENAR), është trefishuar diskriminimi në vendet e punës për punonjëset me hixhab. Një arsye e mjaftueshme kjo për të protestuar dhe në ditën e 1 majit. /tesheshi.com/
