Kampionët në fuqi të Francës bënë një paraqitje të jashtëzakonshme ndaj Barcelonës në të parin takim të një të tetave të Champions League-s.
Fitore e madhe për PSG-në në një mbrëmje të madhe. Rezultati 4-0 reflekton tërë atë që u pa në fushë: një PSG të etur për sukses, një Barcelonë të fishkur nga entuziazmi.
Pjesa e parë qe si melodi për vendasit… Vallëzuan me topin dhe shënuan dy herë. Fillimisht me një perlë të Di Maria-s, e më pas përmes gjermanit Draxler, të ardhur në Paris vetëm pak javë më parë.
Asgjë nuk i ndali lojtarët e PSG-së as në 45 minutat e dyta. Argjentinasi Di Maria dhuron një tjetër perlë, ndërsa nuk mungon dhe Cavani si shënues, e pikërisht në ditën që mbush 30 vjeç.
Një fitore që i jep mundësi PSG-së të jetë me një këmbë e gjysmë në çerekfinale, edhe pse duhet pritur ndeshja e kthimit e 8 marsit.
Sa për katalanasit, ata qenë më pak se hija e vetvetes në këtë mbrëmje. Do duhet të kërkosh shumë mes statistikave për të gjetur një tjetër paraqitje më të dobët se kaq gjatë kohëve të fundit.
Në sfidën tjetër të kësaj të marte, Benfika fitoi 1-0 ndaj Borusias së Dortmundit; një rezultat që lë gjithçka të hapur për ndeshjen e kthimit. Goli i vetëm për skuadrën portugeze u shënua nga Mitroglou në nisje të pjesës së dytë. Nuk duhet harruar një 11-metërsh i çuar dëm nga Aubameyang për Dortmundin në minutën e 58-të. /tesheshi.com/
