Veç dënimit të përdorimit të simboleve të komunizimit me një ligj të posaçëm, PD kërkon dhe dërgimin para drejtësisë të gjithë atyre që kanë bërë krime kundër njerëzimit në komunizëm.
Oerd Bylykbashi, nënkryetari i grupit parlamenetar thotë se çështja nuk duhet trajtuar si fenomen, por duke evidentuar përgjegjësinë kriminale të gjithësecilit, sipas dispozitave në fuqi të kodit penal.
Sipas Bylykbashit, Shqipëria është e vonuar ta bëjë këtë, por nuk duhet humbur më shumë kohë. Nënkryetari i grupit parlamentar për komisionet e posaçme dhe reformat, beson se është krejtësisht i mundshëm suksesi i kësaj ndërmarrjeje tjetër të Partisë Demokratike për dënimin e krimeve të komunizimit, pasi për to nuk ka afat parashkrimi të ndjekjes penale. Hetimi e gjykimi mund të filloje në çdo kohë.
“Kodi penal ka një dispozitë specifike jo vetëm për genocidin, por dhe për krimet kundër njerëzimit dhe ajo dispozitë vetëm pret që të furnizohet me rastin konkret përpara gjykatës. Pret që dikush, jo vetem individ, por dhe insitucion, por dhe parti apo qoftë dhe organizatë, ta bëjë gati dosjen për x apo y kriminel të kohës së komunizmit dhe ta çojë atje”, tha ai.
Bylykbashi sjell në vëmendje disa raste. Në Rumani një 90-vjeçar u dënua për krime kundër njerëzimit si krimenel i komunizimit. Polonia kërkon ekstradimin nga Amerika ku është fshehur me identitet të rremë një person mbi 90 vjeç për krime kundër njerëzimit bërë në kohën e nazizimit. Italia ka rastin e masakrës së famshme të Marka Botos para 73 vitesh, ku vdiqën 700 persona. 10 ushtarakë u dënua në vitin 2007 për krime lufte.
“Dhe ngjashmëria e tyre është pavarësisht kur kanë ndodhur dhe në ç’moshë është krimineli. Ata dënohen se ndjekja penale për këto lloj krimesh nuk pushon kurrë. Pse? Interesi publik është që të pastrohet ndërgjegja nga këto lloj krimesh të rënda. Shqipërisë i mungon pikërisht kjo. Ky është një lloj katarsisi që bëhet përmes bisturisë së ligjit e drejtësië. Nuk është hakmarrje dhe individualizimi e jo të flasim për fenomenin është elementi që të çon në sukses”, shprehet Bylykbashi.
Dhe që nisma të ketë sukses, Bylykbashi sugjeron që këto nuk duhen trajtuar si fenomene, por duhet vepruar me individualizimin e përgjegjësisë kriminale dhe për këtë nuk ka nevojë për shumë legjislacion.
“Fenomenin të gjithë e dimë dhe kemi denuar. Qasja besoj fituese është individualizimi i përgjegjësisë kriminale të atyre që kanë vrarë ata gati 7 mijë veta në Shqipëri. Kemi 7 mijë emra që po t’i rendësim anash tyre, në shumicën e rasteve nuk kemi emrin e kriminelit të dënuar. Për çdo krim të thjeshtë kërkojmë kriminelin. Për këto krime nuk ka, ose ka shumë pak. Kush vrau Havzi Nelën, kush vrau tjetrin e tjetrin… kush i vrau ata djem të rinj në kufi në vitin ‘91 dhe pse nuk ishte më tradhti ndaj atdheut”, tha deputeti i PD-së. /tesheshi.com/
