Papa Francesku apeloi famullitë katolike në Europë të hapin dyert për të strehuar refugjatët, ndërsa vijon fluksi i paprecedent që nga lufta e Dytë Botërore. “Secila famulli të strehojë nga një familje”, tha papa. Nisma është një gjest konkret në përgatitjen e Vitit të Shenjtë, por kardinali hungarez ka një vërejtje: “Ne nuk mundemi, do të konsiderohej e paligjshme”, tha ai.
Papa Francesku e ka bërë apelin për ndihmë ndaj refugjatëve në lutjen Angelus, ditën e diel.
Nisma do të nisë nga dioqeza e Romës dhe dy famullitë e Vatikanit do të mirëpresin këto ditë dy familje refugjatësh.
“Le të japim një shpresë konkrete”, tha papa, duke vijuar se “përballë dhjetëra mijë refugjatëve që i ikin luftës e urisë, thirrja është e qartë, le t’u gjendemi pranë më të dobtëve, më të vegjëlve dhe të braktisurve”.
Kreu i Vatikanit ka kujtuar nënë Terezën e Kalkutës. “Jo një familjeje të mbyllur, një grupimi të mbyllur, atdheu të mbyllur”, tha ai, pasi “zoti nuk mbyllet në vetvete, ai është në komunikim me njerëzimin”.
Por, ndërkaq, nisma e Papës ka vënë në vështirësi kardinalin hungarez, që thotë se nuk mund të mirëpresë refugjatë.
Peter Erdoe, arkipeshkv i Esztergom, tha për gazetarët se kisha katolike në vendin e tij nuk mund të strehojë refugjatët. “Mund të klasifikohet si një veprim i paligjshëm, trafik qëniesh njerëzore”, tha ai. /tesheshi.com/
