Jurgen Klopp pati paralajmëruar se Liverpuli do t’i bënte të dridheshin skuadrat e Premier League-s. Ka mjaftuar vetëm një ndeshje për t’i vërtetuar fjalët e tij. Viktima ka qenë Arsenali në këtë pasdite të së dielës.
Topçinjtë i kanë bërë rishtas një nisje të tmerrshme sezonit. Një vit më parë, më 9 gusht, humbisnin 0-2 ndaj Uest Hemit në “Emirates Stadium”. Në të njëjtin terren sportiv, në prani të më shumë se 60.000 tifozëve, ata i janë nënshtruar furtunës së Liverpulit.
Me një fushatë transferimesh gati të dështuar, me një mbrojtje të improvizuar, Arsenali nuk ka mundur të bëjë asgjë më shumë ndaj Liverpulit, veçse ta ngushtojë rezultatin final të humbjes.
Në minutën e 63-të, Liverpuli kryesonte 1-4. Së pari kishin kaluar në epërsi vendasit. Walcott do të shënonte në minutën e 31-të, vetëm pak pasi kishte shpërdoruar një 11-metërsh. Për të pasuar golat e Liverpulit. Dy herë ka shënuar Coutinho, e nga një herë kanë realizuar Lallana e Mane.
Oxlade-Chamberlain dhe Chambers thjesht i kanë çuar shifrat në 3-4, çka është dhe rezultati përfundimtar i takimit.
Arsen Venger zgjodhi ta aktivizojë Granit Xhaka-n në pjesën e dytë, në tridhjetë minutat e fundit, një vendim që duket të ketë ndikuar në ecurinë e lojës.
Ky fillim i mbrapshtë ia bën më të vështirë detyrën francezit, që përballet me një presion në rritje për shkak të mungesës së trofeve të fituar. Atë e pret një tjetër sfidë e jashtëzakonshme të shtunën e ardhshme, ndërsa Arsenali do të luajë në transfertë ndaj kampionëve të Lestër Sitit. /tesheshi.com/
