Kryeministri izraelit Benjamin Netanyahu ka paralajmëruar se një valë sulmesh ajrore që kanë vrarë qindra palestinezë në Gaza është “vetëm fillimi”.
Në një fjalim televiziv të martën mbrëma, Netanyahu tha se forcat izraelite do të sulmonin Hamasin “me forcë në rritje” dhe se bisedimet e ardhshme të armëpushimit “do të zhvillohen vetëm nën zjarr”.
“Hamasi ka ndjerë tashmë peshën e forcës sonë në 24 orët e fundit dhe unë dua t’ju siguroj ju – dhe ata – se ky është vetëm fillimi”, tha udhëheqësi izraelit.
“Ne do të vazhdojmë të luftojmë për të arritur të gjitha qëllimet tona të luftës; lirimin e të gjithë pengjeve, eliminimin e Hamasit dhe premtimin se Gaza nuk do të përbëjë më një kërcënim për Izraelin.”
Deklaratat kërcënuese të Netanyahut vijnë pasi sulmet vdekjeprurëse izraelite në të gjithë Gazën shkatërruan një armëpushim të brishtë me Hamasin, i cili filloi më 19 janar.
Sulmet ajrore vranë të paktën 404 palestinezë, shumë prej të cilëve fëmijë dhe u plagosën më shumë se 560 të tjerë, sipas Ministrisë së Shëndetësisë së Gazës.
Sulmi kishte në shënjestër zona të gjera të Gazës, duke përfshirë Khan Younis dhe Rafah në jug, qytetin e Gazës në veri dhe zona qendrore si Deir al-Balah, duke zhdukur familje të tëra.
Bisedimet për fazën e dytë të marrëveshjes së armëpushimit midis Izraelit dhe Hamasit, e cila do të lejonte lirimin e gati 60 të burgosurve të mbetur të mbajtur nga Hamasi dhe vendosjen e një armëpushimi të përhershëm, kanë qenë në bllokim për shkak të këmbënguljes së Izraelit që faza e parë të zgjatet deri në mes të prillit.
Izraeli javën e kaluar hodhi poshtë ofertën e Hamasit për të liruar një shtetas amerikano-izraelit dhe trupat e katër të burgosurve të vdekur në këmbim të fillimit të fazës së dytë të negociatave dhe përfundimit të bllokadës izraelite të vendosur në fillim të këtij muaji. /tesheshi.com/
