Njoftimet kontradiktore po vijnë për Rrugën e Kombit. Nga koncensionari është bërë e ditur se sot nis testi për ta bërë tunelin e Kalimashit me pagesë.
Kompania ka instaluar sportelet dhe theksohet se tani në mesditë do të zhvillohen provat e para për të marrë para. Por ende nuk ka asnjë njoftim zyrtar nga Ministria e Infrastrukturës dhe Energjisë apo Autoriteti Rrugor.
Flitet se çdo automjet që do të kalojë në Rrugën e Kombit është i detyruar që të paguajë nga 5 deri në 10 euro. Taksa do te aplikohet në katër sportele, dy për hyrjet dhe dy të tjerë për daljet në këtë rrugë.
Mëngjesin e sotëm janë vendosur trarët, në mënyrë që testimi në mesdite të jetë gati për t’u kryer. Koncesionari përdor një shesh me dy kahe për pagimin e taksës në afërsi të tunelit të Thirrës.
Por nuk dihet se si do të veprohet për banorët e Kukësit dhe fshatrave përreth për të cilët u tha se nuk taksohen. Nuk dihet sa do të jenë tarifat për veturat, autobusët apo kamionët e tonazhit të lartë siç ndodh kudo.
Ka një mungesë të madhe transparence, që vetëm shton spekulimet për një fakt me interes të madh. Jo vetëm për qytetarët e Shqipërisë por edhe ata të Kosovës, pasi Rruga e Kombit u ndërtua edhe për ta. /tesheshi.com/
