Nga Ylli Pata
Mali i Zi ka nisur votimet për zjedhjen e parlamentit të ri, ndërkohë që dy koalicionet kryesore shqiptare kanë akuzuar atë të Nikollë Camajt në Malësi se është “një kalë troje malazez”.
Kjo për arsye se ajo nuk ka mundësi të marrë deputetë, por votat që mund të marrë thjesht do të kalojnë në anën malazeze.
Ndaj dy koalicionet bëjnë thirrje që të mos votohet Nikollë Camaj.
Në zgjedhjet e kaluara parlamentare në Mal të Zi garuan 23 lista zgjedhore, ndërkohë që 4 prej tyre ishin të partive shqiptare, edhe pse shqiptarët përbëjnë vetëm 5% të popullsisë. Partitë shqiptare e humbën një deputet si pasojë e përçarjes së tyre në katër lista duke marrë në total vetëm 2 deputetë nga tre që do ishte e mundur po të ishin të bashkuar.
Lista e FORCA për Bashkim ka marrë 5244 vota dhe një deputet; Lista Koalicioni Shqiptar e përbërë prej Partisë Demokratike dhe Lidhjes Demokratike në Mal të Zi mori 3824 vota dhe siguroi gjithashtu një deputet; lista e Unionit Demokratik Shqiptar mori vetëm 2848 dhe nuk mori asnjë deputet; ndërsa lista Aleanca Rinore Shqiptare e drejtuar prej Anton Lulgjuraj dhe e përkrahur prej diasporës shqiptare në SHBA mori vetëm 531 vota dhe asnjë deputet.
Nëse UDSH-ja do të kishte marrë 250 vota më shumë do të kishte siguruar një deputet; po ashtu nëse Forca do të kishte marrë rreth 350 vota më shumë do të kishte siguruar deputetin e dytë të listës së saj. Mirëpo me mijëra vota shqiptare shkuan kot dhe deputetin që duhet ta kishin marrë partitë shqiptare shkoi në llogari të partive malazeze. Kuptohet që konkurrimi me një listë të re, edhe pse nuk ka shanse fitore, ka leverdi ekonomike sepse kushdo që siguron mjaftueshëm nënshkrime për të regjistruar një listë zgjedhore siguron 22 000 euro nga buxheti shtetëror për fushatën.
Sipas të gjitha gjasave, rolin përçarës dhe tretjen e deputetit të tretë shqiptar në zgjedhjet e 16 tetorit do ta shkaktojë lista e Lidhjes Demokratike Shqiptare të drejtuar nga Nikollë Camaj e cila mund të sigurojë një deputet vetëm nëse trefishon votat e deritanishme. Për të krijuar një ide të përafërt të votave që mund të marri lista e tretë nevojitet që të analizohen votat e Lidhjes Demokratike në Mal të Zi në zgjedhjet e kaluara. Në zgjedhjet lokale që u zhvilluan në vitin 2012, Lidhja Demokratike në Mal të Zi mori 749 vota në Komunën e Tivarit, 302 vota në Plave e Guci dhe 318 në Ulqin. Në Rozhajë, LDMZ nuk figuron në zgjedhjet lokale, por në ato parlamentare në të njëjtin vit bashkë me Partinë Demokratike dhe Alternativën Shqiptare në kuadër të Koalicionit Shqiptar morën 81 vota. Ndërsa në zgjedhjet lokale të vitit 2014, Lidhja Demokratike në Mal të Zi mori tre mandate me 891 vota.
Pra, duke përllogaritur votat nëpër krahina të ndryshme në zgjedhjet e kaluara, në total Lidhja Demokratike në Mal të Zi ka marrë 2341 vota . Nga këto 1274 vota janë marrë nga degët e LD në MZ të Rozhajës, Plavë-Gucisë si dhe Malësisë që u ndanë dhe sot janë nën udhëheqjen e Nikollë Camaj, si dhe 1067 votat e degëve të Ulqinit dhe Krajës që vazhdojnë të jenë në kontroll të Mehmet Bardhit. Bashkimi me doktor Isat Jakupin është krejt pa peshë pasi zgjedhjet e fundit ku ka marrë pjesë ai ka qenë ajo e vitit 2010 kur ka marrë vetëm 86 vota, që po t’i shtohen votave të kaluara të degëve të LDMZ-së që drejtohet nga Camaj shkojnë në total 1360.
Pra do duhej që Camaj t’i trefishojë votat për të siguruar një deputet, çka do të thotë se votat shqiptare të Listës së Lidhjes Demokratike Shqiptare sipas të gjitha gjasave jo vetëm kanë për të shkuar dëm por kanë për të penguar dy listat e tjera shqiptare që të marrin deputetin e tretë. Është e pakuptueshme se përse Z. Camaj dhe forca e re politike që ai ka krijuar prej shkëputjes nga LDMZ-ja e drejtuar prej Mehmet Bardhit, i ka hyrë kësaj aventure politike që i ka gjasat e vogla për të pasur sukses. /tesheshi.com/
