Mbrëmjen e kësaj të marte fillojnë të luhen takimet e kthimit të 1/8-ave të Champions League-s. Katër takime do të zhvillohen sonte e nesër, nga dy për çdo mbrëmje, e të njëjtin rregull do të ndjekin sfidat e javës së ardhshme.
Real i Madridit – Roma dhe Volfsburg – Gent janë përballjet që do kemi mundësi t’i shohim pas disa orësh.
Madrilenët presin në “Santiago Bernabeu” romanët, që kanë një rritje të jashtëzakonshme në lojën e tyre gjatë javëve të fundit. Edhe pse takimi i parë në kryeqytetin italian ka përfunduar 0-2 për miqtë nga Madridi, sfida e kësaj mbrëmje mbetet përsëri mjaft interesante. Një mungesë e vogël vëmendjeje nga ana e lojtarëve të Realit mund të kushtonte shumë, pasi Roma gjendet në momentin e saj më të mirë.
Dy gjëra mund të thuhen me siguri për këtë takim, që Reali është më pranë kualifikimit, e që Roma nuk është në një udhëtim turistik, pasi nuk e mendon dorëzimin.
Në përballjen tjetër, që luhet në Gjermani, vendasit e Volfsburgut janë një hap më përpara në luftën për të shkuar në çerekfinale. Ata kanë fituar 2-3 ndaj Gentit në Belgjikë, ndaj u mjafton një administrim i mirë i lojës për ta arritur objektivin. Por, sidoqoftë, ndeshja është e paparashikueshme, duke patur parasysh nivelin jo shumë të ndryshëm midis dy skuadrave.
E mërkura është rezervuar për takimet Zenit – Benfika dhe Çelsi – PSG. /tesheshi.com/
