Në stadiumin e famshëm Marakana kanë nisur Lojërat Olimpike, të 31-tat në historinë e tyre. Një atmosferë e jashëzakonshme ka qenë në stadiumin gjigand, me një ceremoni të transmetuar për rreth tre miliardë shikues në tërë botën.
Sido që ka qenë një ceremoni shumë më pak e kushtueshme se ajo e katër viteve më parë në Londër, në të nuk ka munguar thuajse asgjë.
Gjithçka që i ka paraprirë kësaj olimpiade ka mbetur pas tashmë, protestat e vazhdueshme në Brazil, rreziku nga virusi Zika, apo çështja e atletëve rusë, që gati sa nuk u përjashtuan të tërë për shkak të skandalit të dopingut.
Flaka olimpike është sjellë në stadium nga tre herë kampioni i turneut të tenisit French Open, Gustavo Kuerten, për t’u kaluar në duart e basketbollistes Hortencia Marcari, që më tutje do t’ia jepte atë ish-maratonistit brazilian Vanderlei de Lima. Legjenda e futbollit, Pele, ishte menduar të qe pjesë e kësaj ceremonie, por ai do të tërhiqej për arsye shëndetësore.
Do të garohet në 28 sporte, dy prej të cilëve janë përfshirë për herë të parë.
Janë 207 ekipe, e gati 12.000 atletë, ndërsa skuadra më e madhe olimpike është ajo e Shteteve të Bashkuara të Amerikës.
Presidenti i komitetit organizator të Rio 2016-tës, Carlos Nuzman, do të thoshte: “Endrra olimpike është tani një realitet. Unë jam krenar për qytetin tim, për vendin tim. Këto janë Lojërat tona, të parat në Amerikën e Jugut. Rio është gati të bëjë historinë.” /tesheshi.com/
