Fundi i vitit shoqërohet tradicionalisht me incidente të rënda të shkaktuara nga fishekzjarret, të përdorura dendur në këtë periudhë kohore nga i madh e i vogël. Një incident i tillë u ka marrë së fundi jetën në Meksikë më së paku 31 personave, si dhe ka lënduar 70 të tjerë.
Shpërthimi nga fishekzjarret ndodhi në periferinë veriore të Meksiko Sitit, në një treg për to të mbushur me njerëz.
Pamjet nga vendi i ngjarjes në tregun e San Pablitos tregojnë një tym të madh të krijuar nga shpërthimi i masës së fishekzjarreve.
Më shumë se një duzinë fëmijësh kanë pësuar djegie në mbi 90 për qind të trupit të tyre dhe janë dërguar në Galveston, në Teksas të SHBA-së, për trajtim më të specializuar.
Mediat lokale raportojnë për një sasi prej 300 tonësh fishekzjarre në treg para shpërthimit tragjik.
Një incident i ngjashëm në të njëjtin treg ka ndodhur në shtator të 2005-s, kur shpërthimet plagosën 128 persona. /tesheshi. com/
