Kthehet vëmendja edhe njëherë nga Europiani i Francës pas dy ditëve pushim. Eshtë tani radha e çerekfinaleve, ku do të luhet fati i tetë përfaqësueseve.
I hap këto çerekfinale takimi Poloni – Portugali, që do të luhet sonte në 21:00, në “Velodrome” të Marsejës. Gjyqtari i ndeshjes do të jetë gjermani Felix Brych.
Polakët vijnë në çerekfinale pasi eliminuan Zvicrën në një të tetat. Takimi i luajtur më 25 qershor do të përfundonte 1-1, e do të mbahet mend për atë gol të jashtëzakonshëm të Xherdan Shaqirit, më i bukuri gjer tani në Europian. Polakët do të kualifikoheshin pas gjuajtjeve të 11-metërshave, ku i vetmi që gaboi ishte Granit Xhaka për zvicerianët.
Kurse Portugalia do të eliminonte Kroacinë, një prej skuadarve pretendente. Do të ishte ai një takim i mërzitshëm në pjesën më të madhe të tij, mjaft taktik, por që do të gjallorohej vetëm në çastet e fundit të shtesave nga 15 minuta.
Do të luheshin këto shtesa pasi loja e regullt do të përfundonte 0-0. Ricardo Quaresma do të shënonte në minutën e 117-të, duke u dhënë portugezëve fitoren 1-0.
Kjo do të jetë hera e tretë që Portugalia dhe Polonia takohen në një turne të përmasave të mëdha. Polonia do të fitonte 1-0 në Kupës e Botës të vitit 1986, e Portugalia do të përgjigjej me një fitore 4-0 në të njëjtën veprimtari në vitin 2002.
Në tre ndeshjet e fundit mes tyre, polakët kanë një fitore e dy barazime. Një barazim 0-0 në Varshavë, në shkurt të 2012-tës, është përplasja më e fundit midis dy çerekfinalistëve.
Tre çerekfinalet e tjera do të luhen në tre ditët pasardhëse. Çdo ditë do të ketë një çerekfinale, e orari do të jetë i njëjtë për të tëra sfidat, në 21:00.
Të premten do të kemi çerekfinalen Uells – Belgjikë, të shtunën është sfida më emblematike e Europianit, Gjermani – Itali, e të dielën Franca ndeshet me Islandën, përfaqësuesen më surprizë. /tesheshi.com/
