Partia NISMA për Kosovën, dega në Prizren, ka bërë të ditur se në këtë qytet, në disa qendra votuese, Komisioni Komunal Zgjedhor nuk i ka pajisur me kartela identifikuese komisionerët, si në qendrat 2006A, 2003A dhe në 2040A.
“Në të njëjtën kohë, në qendrën votuese 2016A (Dardania), në dhomën e votimit, qytetarit i është imponuar që të votojë me lapsin e koalicionit që mban numrin 16 (LDK-AKR-ALTERNATIVA) dhe emrin e kandidatit të këtij koalicioni, Ramiz Kelmendi.
Në reagimin e qytetarit se përse është lapsi me logo të subjektit të caktuar politik, kryesuesi i vendvotimit është arsyetuar se nuk kemi lapsa të tjerë,” njofton kjo parti. /tesheshi.com/
