Sapo ka nisur takimi mes Kryeministrit të Kosovës Isa Mustafa dhe atij të Serbisë, Aleksandër Vuçic, që po zhvillohet në kryeqendrën e Europës nën prezencën e shefes së diplomacisë së BE-së, Federika Mogherini.
Ka qenë zëdhënësja e saj, Maja Koçiançic, që ka bërë të ditur nisjen e takimit në faqen e saj në twitter.
Sipas paralajmërimeve zyrtare ngë Brukseli, që theksohen edhe në Prishtinë, diskutohet zbatimi i marrëveshjeve të arritura deri më tani dhe rruga përpara në dialog, ndërsa sipas mediave të Beogradit“tema kryesore do të jetë formimi i Bashkësisë së komunave serbe”.
Asociacioni i komunave me shumicë sebe në Kosovë është një nga katër marrëveshjet Prishtinë-Beograd të nënshkruara në mbrëmjen e 25 gushtit 2015 në Bruksel, në raunin e 28 të dialogut në nivel kryeministrash, ndërsa kundërshtohet nga opozita kosovare me bllokim të seancave të Kuvendit të Kosovës edhe me hedhje gazi lotsjellës e me protesta, prej më shumë se katër muajsh dhe me paralajmërime edhe në vazhdimësi.
Në 23 dhjetor 2015, Gjykata Kushtetuese, pas kërkesës që i është bërë nga Presidentja e Republikës të vlerësojë përputhshmërinë e dokumentit të emërtuar “Asociacioni/Bashkësia e komunave me shumicë serbe në Kosovë – parimet e përgjithshme/elementet kryesore”, ka vendosur se, “këto Parime nuk janë tërësisht në përputhje me standardet kushtetuese përkatëse dhe ka konkluduar se akti ligjor i qeverisë së Republikës së Kosovës dhe Statuti duhet të jenë në përputhje”.
Pas këtij vendimi, qeveria e Kosovës ka siguruar se, “i tërë procesi dhe çdo akt juridik për të finalizuar asociacionin e komunave me shumicë serbe do bëhet duke u bazuar dhe respektuar konkluzionet e Gjykatës Kushtetues” dhe se “edhe Statuti i asociacionit do të dërgohet në Kushtetuese”.
Subjekti më i madh opozitar në Kosovë, Lëvizja Vetëvendosje dje ka mbajtur konferencë shtypi “për të kundërshtuar edhe një herë vazhdimin e paralajmëruar të negociatave me Serbinë”, siç theksohet në komunikatë, duke u shprehur se, “përmes marrëveshjeve me Serbinë është shkelur Kushtetuta në 23 nene të saj”.
Takimet në nivel të lartë në Bruksel të kryeministrave aktualë Mustafa e Vuçiç, të qeverive të zgjedhjeve 2014 në të dy shtetet, që u mbajtën më parë në Serbi e pastaj në Kosovë, pasojnë 23 raundet e zhvilluara nga kryeministrat e mëparshëm Hashim Thaçi e Ivica Daçiç, të cilët edhe tash janë pjesëmarrës delegacionesh në këtë dialog si ministra të punëve të jashtme./tesheshi.com/
