Presidenti në detyrë, Bujar Nishani thirri sot anëtarët e Kolegjit Zgjedhor, i cili trahton ankesat ligjore lidhur me procesin zgjedhor të 18 qershorit.
Zyra e shtypit njofton se Presidenti i Republikës pasi theksoi rëndësinë që ka çdo proces zgjedhor, vlerësoi edhe një herë, se sa e nevojshme dhe e domosdoshme, është ushtrimi i veprimtarisë së Kolegjit Zgjedhor për të trajtuar me korrektësi të gjitha konfliktet që do të paraqiten para tij nga subjektet e ndryshme, deri në përfundim të gjykimit të gjithë ankimeve lidhur me procesin zgjedhor.
Trupa gjyqësore përbërëse e Kolegjit Zgjedhor, sipas njoftimit për shtyp të Presidencës, ka eksperiencë të gjatë në ushtrimin e veprimtarisë gjyqësore, dhe, sipas saj, “do të jetë në lartësinë e duhur për të garantuar përmbushjen me shumë sukses të detyrës dhe misionit për të cilin ky Kolegj do të funksionojë”. Nishani shprehu besimin dhe kërkoi nga Kolegji Zgjedhor, që të qëndrojë me bindje të plotë, vetëm Kushtetutës dhe ligjeve të Republikës, në respekt të të drejtave dhe lirive të njeriut, çka do të sjellë drejtësi dhe paanësi në kryerjen e detyrës.
Një nga çështjet që ky kolegj pritet të marrë të parën në dorë mund të jetë afati i regjistrimit të kandidatëve për deputetë, të cilin PD-ja e ka cilësuar antikushtetues. Partitë që marrin pjesë në zgjedhje i regjistruan kandidatët më datë 29 prill, por sipas juristëve të PD-së është shkelur afati ligjor pasi duhej të ishin regjistruar më datë 28 prill. PD dhe disa aleatë të saj nuk marrin pjesë në këto zgjedhje./tesheshi.com
