Presidenti i Shtetit Bujar Nishani ka qenë ditën e sotme i pranishëm në vendin ku po zhvillohet projekti ndërtimor në liqenin artificial. Prej aty ai u shpreh se parku u takon qytetarëve të Tiranës, ndërsa në replikë me kryetarin e Bashkisë, Erion Veliaj, deklaroi se shpesh Presidenti është sulmuar me fjalor rrugaçësh.
“Parku është i këtyre djemve dhe vajzave të arsimuar, mendjehapur për t’i rezistuar vandalizmit dhe vandalëve. Kjo lëvizje qytetare shkon përtej kauzës së parkut të vetëm të qytetit të Tiranës. Po lind një lëvizje qytetare për emancipim, për civilizim. Beteja e emancipimit me vandalizmin, me dhunën nuk është e lehtë, por gjithmonë ka një fillim”, – tha Presidenti Nishani.
Ai shtoi se ndoshta në fillim duket se janë një grup i vogël fizikisht por mendërisht dhe shpirtërisht me ta janë një grup i madh personash. Për Nishanin, kjo lëvizje nuk është politike, partizane, militanteske, por qytetare, e stilit perëndimor europian, aty ku identiteti i shqiptarëve janë të adresuar.
Duke folur për pritjen që u bëri anëtarëve të grupimit qytetar në Presidencë, Nishani deklaroi se është detyra e një Presidenti të presë një grup qytetarësh për të shprehur shqetësimin e tyre.
“Ata që shqetësohen nga kjo lloj kulture e sjelljes institucionale i përkasin nëj kulture tjetër të izolimit dhe të mbylljes brenda zyrave e bunkereve. Unë jam i hapur me qytetarët. Është sjellje e thjeshtë dhe dinjitoze që duhet ta implementojë çdo qeveritar”, – tha Nishani.
Më tej ai vijoi: “Nuk është hera e parë që sulme me fjalor rrugaçësh adresohen ndaj Presidentit. Lëvizja që ka lindur këtu është një lëvizje civile, e emancipimit. Unë jam me ta si njeri, si qytetar, si prind, jo vetëm si President i Republikës”, – tha Nishani.
Duke iu referuar edhe një herë deklaratës së kreut të Bashkisë së Tiranës, Erion Veliaj, Nishani bëri me dije se “rezidenca qeveritare presidenciale e ndërtuar 6 vite më parë nuk është brenda parkut, nuk është e Bujar Nishanit, por këta që kanë kulturën e makutit, e konsiderojnë që prona e popullit dhe shtetit është e tyrja personale”
“Mos u bëni pre e kësaj dhune verbale. Të gjithë qytetarët do të jenë bashkë me ju për të ecur përpara, për civilizimin dhe emancipimin e shoqërisë. Duhet të vëmë në funksionim shtetin ligjor. Të gjithë të jenë të barabartë para ligjit”, – tha ndër të tjera Presidenti Bujar Nishani. /tesheshi.com/
