Presidenti i Republikës, Bujar Nishani nderoi heroizmin e ushtarëve britanikë të rënë në vendin tonë gjatë Luftës së Dytë Botërorenë, në Ditën e Kujtesës. Në fillim u krye shërbesa fetare me lutje dhe përshpirtje për të rënët. Në këtë ceremoni u përkujtua edhe Kapiteni shqiptar Feti Vogli, i cili humbi jetën në Afganistan në vitin 2012. Më pas, Nishani u përul para veprës heroike të të rënëve britanikë, në kujtim të të cilëve vendosi edhe një kurorë me lule në Memorialin kushtuar ushtarakëve dhe civilëve britanikë që humbën jetën në Shqipëri gjatë viteve 1939-1945. Presidenti vlerësoi heroizmin e tyre, të cilët dhanë jetën për lirinë, ndërsa prehen përjetësisht në Parkun Kombëtar të Liqenit Artificial të Tiranës.
Në këtë ceremoni ishin të pranishëm Ambasadori i Mbretërisë së Bashkuar në Shqipëri, Duncan Norman MBE, përfaqësues të shumtë të Trupit Diplomatik të akredituar në vendin tonë, të kabinetit qeveritar, deputetë të Kuvendit, përfaqësues të Forcave të Armatosura, të komuniteteve shqiptare si dhe të shoqatave të të përndjekurve politikë, etj./tesheshi.com
