Shteti i Vatikanit, në të cilin ndodhet qendra e Kishës Katolike Botërore vazhdon të refuzojë njohjen e shtetit të Kosovës.
Pas ceremonisë së bujshme për shenjtërimin e Nënë Terezës dje në Vatikan, ku morën pjesë të gjithë krerët e shteteve të Shqipërisë dhe Kosovës, sot janë zhvilluar disa takime protokollare më shumë korteziale.
Presidenti i Shqipërisë, Bujar Nishani, ka shfrytëzuar një nga këta takime për të kërkuar nga Vatikani njohjen e Kosovës.
Kështu thuhet në një njoftim për media të Presidencës.
“Presidenti i Republikës, Bujar Nishani, u takua sot edhe me Sekretarin e Shtetit të Vatikanit, Kardinalin Pietro Parolin, si dhe ndoqi Meshën e Falënderimeve të kryesuar nga Kardinali për Nënë Terezën, vetëm një ditë pas shpalljes si Shenjtore.
Duke u ndalur në çështjen e Kosovës, Presidenti Nishani vlerësoi vëmendjen e veçantë që Selia e Shenjtë i kushton marrëdhënieve me Kosovën dhe duke vlerësuar gjithashtu procesin e negociatave dhe të pajtimit mes Kosovës dhe Serbisë, shprehu besimin se shumë shpejt edhe Selia e Shenjtë do të marrë një vendim për njohjen e pavarësisë së saj, në shërbim të mëtejshëm të paqes dhe sigurisë në rajonin e Ballkanit dhe Evropës Juglindore.
Nga ana e tij, Kardinali Parolin vlerësoi harmoninë fetare në Shqipëri, duke e konsideruar si një shembull të shkëlqyer për një Evropë pluraliste dhe multikulturore, si dhe e siguroi Presidentin Nishani për vijimin e vëmendjes së Selisë së Shenjtë ndaj Shqipërisë dhe shqiptarëve”, thuhet ndër të tjera në njoftimin për shtyp të Presidencës.
/tesheshi.com/
