Presidenti Bujar Nishani thotë se letra e mbërritur edhe në zyrën e tij nga kreu i komisionit të Sigurisë, Spartak Braho nuk përbën shqetësim për sigurinë kombëtare, edhe pse u komentua gjerësisht se aty ngrihej shqetësimi për destabilizimin e vendit. Në një intervistë në programin “Tonight” të gazetares Ilva Tare, Nishani nuk u ndal në përmbajtjen e letrës, por theksoi se ajo i ishte drejtuar kryeministrit, dhe për dijeni atij vetë.
“Më duhet të jap një sqarim, që letra nuk i është drejtuar as Presidentit të Republikës, as Kryetarit të Kuvendit por Kryeministrit, por për dijeni edhe presidentit dhe kryetarit të Kuvendit dhe bëj këtë sqarim sepse ka sens përsa i përket pikëpamjes përmbajtësore sepse letra iu drejtua Kryeministrit për qëllimet që kishte letra në mënyrë të tillë që qeveria e kryeministri të veprojnë për të marrë masa për ato që janë renditur në letër”, tha Nishani.
“Nuk kemi aktualisht ndonjë shqetësim që të na cënojë sigurinë kombëtare, besoj tek efikasiteti i ligjit në Shqipëri. Jam i bindur që çdo gjë me vullnet mund të zgjidhet”, theksoi Nishani, e i pyetur nga Tare nëse ka nevojë për të thirrur këshillin e Sigurimit Kombëtar, ai u përgjigj:
“Po të kishte një gjë të tillë, me siguri do ta kisha thirrur”.
Presidenti Nishani ka dalë në favor të hetimit ndërkombëtar të skandalit të CEZ.
“Aktualisht ka një iniciativë shumë pozitive në Kuvendin e Shqipërisë për një hetim të gjithanshëm. Dy nga grupet kryesore të Kuvendit janë angazhuar për miratimin e një ligji që të kryhet një hetim i plotë. S’ka arsye që edhe pjesa tjetër e Kuvendit mos ta mbështesë. Mendoj se duhet hetim ndërkombëtar për dy arsye: së pari ka një akuzë nga ana e opozitës ndaj qeverisë, nga ana tjetër ka një akuzë nga qeveria aktuale ndaj opozitës kur ajo ishte në pushtet, kështu që përderisa pretendimet janë të dyja palëve ndaj njëra tjetrës, është krejt normale që të kalohet në një hetim ndërkombëtar, të paanshëm. Bëhet fjalë për një pjesë të konsiderueshme të buxhetit të shtetit shqiptar”, përfundoi presidenti. /tesheshi.com/
