Shkrimtari Visar Zhiti do të përballet përsëri në një gjykatë, pasi ka vuajtur 8 vite në burgjet famëkeqe të diktaturës komuniste.
Këtë radhë është presidenti në detyrë Bujar Nishani ai që ka kërkuar ‘burgosjen” e Zhitit pas një debati publik mes tyre që lindi si shkak i refuzimit nga ana e kreut të shtetit për t’a dekretuar si ambasador në Vatikan.
Nishani e ka paditur Zhitin në gjykatë me akuzën; “shkaktim dëmi ndaj figurës së tij”. Ai kërkon nga Gjykata e Tiranës dënimin e të paditurit për shkak të deklaratave publike që Zhiti ka bërë në drejtim të kreut të shtetit.
Por ndërkohë që Nishani kërkon “hakmarrjen” me anë të gjyqësorit, në rolin e shkrimtarit Zhiti i ka dhënë një dënim letrar kundërshtarit të tij.
Tesheshi.com mëson se Zhiti sapo ka përfunduar një vepër letrare të shanrit esse, ku flet edhe për Nishanin, sigurisht duke i lejuar penës që “të vrasë”. Pritet që libri të dalë në botim së shpejti dhe të bëhet ndoshta një arsye për ndonjë padi tjetër nga ana e Nishant.
Konflikti mes tyre nisi pasi presidenti refuzoi të dekretonte Zhitin për postin e ambasadorit pranë selisë së shenjtë në Vatikan, i propozuar nga kryeministri Rama.
Zhiti e ka kritikuar shpesh në media Nishanin duke e quajtur një ‘hiç president’.
Presidenti i lejoi vetes të përfshihej në replikë duke e akuzuar shkrimtarin e përdjekur në komunizëm si bashkëpunëtor të sigurimit të shtetit.
Edhe pse Zhiti i kërkoi prova për këto akuza, Nishani nuk solli kurrë prova, por e kundërta e akuzës së tij doli në dritë, kur Gazeta Shqiptare publikoi dokumente që tregonin se Zhiti pati refuzuar të bashkëpunonte me Sigurimin e Shtetit në burgje./tesheshi.com/
