Një deklaratë e bërë nga kryeministri Rama që nuk do donte ta shihte presidentin e Republikës në rolin e një shefi Protokolli, referuar daljes së kreut të shtetit shqiptar në shkallët e avionit të sekretarit Kerry për ta pritur këtë të fundit, ka sjellë reagimet e Presidencës.
Përmes një deklarate për shtyp, presidenti Nishani e ka cilësuar si “të papërgjegjshëm” komentin e kreut të ekzekutivit.
“Kërkesa e Sekretarit Kerry, e përcjellë përmes Ambasadës së SHBA-së në Tiranë për të takuar Presidentin e Republikës gjatë mbërritjes së tij në Shqipëri ishte një nder i veçantë dhe respekt ndaj Institucionit dhe vetë Presidentit Nishani”, thuhet në deklaratë.
“Një qëndrim i tillë nuk përfaqëson nderimin dhe mirënjohjen që shqiptarët anembanë botës kanë ndaj Shteteve të Bashkuara të Amerikës dhe popullit amerikan”, përfundon deklarata.
Por me anë të këtij reagimi, Presidenca nxjerr në pah një fakt, që dalja e tij në Rinas ka qenë me vetë kërkesën e sekretarit Kerry.
Dhe mbetet pikëpyetja e madhe fakti se përse presidenti Nishani nuk e qartësoi këtë fakt ditë më parë, sapo u hap debati mbi precedentin e tij të pazakontë protokollar?! /tesheshi.com/
