Presidenti i Republikës, Bujar Nishani ka dekretuar sot ligjin për amnistinë, një ligj që u miratua në 23 dhjetor.
Të dënuarit që përfitojnë nga amnistia, do të lirohen nga burgu në muajin janar, pas hyrjes në fuqi të amnistisë. Sipas ligjit të miratuar me 84 vota në Kuvend, parashikohet që mbi 700 persona të lënë qelinë, ndërsa mbi 1000 të tjerë të përfitojnë nga uljet, gjobat apo pezullimi i hetimeve.
Me këtë ligj, u zgjerua fasha e përfitimit edhe për të dënuarit me gjobë, lirim me kusht apo dënime të tjera alternative deri në burgim me 3 vjet, si dhe personat që janë në proces për vepra penale që dënimi parashikohet deri në 2 vjet.
Nga amnistia kanë përfituar personat e akuzuar apo të dënuar për vjedhje të energjisë elektrike apo të dënuarit për ndërtim të paligjshëm në tokën e tyre.
Nuk përfitojnë nga kjo amnisti personat të cilët i janë shmangur drejtësisë, qofshin këta shtetas që i janë shmangur autoritetit të ndjekjes penale apo të dënuar që i janë shmangur ekzekutimit të vendimit të dhënë, deri në datën 25 dhjetor të këtij viti. /tesheshi.com/
