Presidenti Bujar Nishani nderoi pas vdekjes me dekoratën e Artë të Shqiponjës, inspektor Ibrahim Pashën, i cili u vra në Lazarat gjatë një operacioni policor që ka mbetur ende i pazbardhur plotësisht.
Dekorata iu dha familjarëve të të ndjerit, në një ceremony të organizuar në Presidencë gjatë së cilës, presidenti Nishani e motivoi vlerësimin “për merita dhe shërbime të veçanta në luftë me grupe të strukturuar kriminale për garantimin e rendit dhe sigurisë publike; për trimëri dhe kontribute të spikatura në operacionet luftarake në Afganistan dhe Irak, në mbrojtje të paqes dhe lirisë, në luftë kundër terrorizmit ndërkombëtar”.
Të pranishëm ishin edhe drejtori i përgjithshëm i Policisë, Haki Çako si dhe miq dhe kolegë të inspektorit Basha.
Presidenti Nishani u shpreh në fjalën e mbajtur me këtë rast se “njerëz të tillë, siç ishte Ibrahimi, kur janë mes nesh sjellin energji, pozitivitet dhe shpresë, por kur ata largohen fizikisht nga ne lënë pas gjithmonë kujtimin e mirë të virtyteve njerëzore”.
Ai u zotua se si president i Republikës, nuk do të rreshtë asnjë moment së kërkuari nga organet ligjzbatuese dhe ato gjyqësore që drejtësia për Ibrahimin të bëhet, e plotë dhe fajtorët të marrin dënimin që meritojnë. /tesheshi.com/
