Ekipi surprizë i kampionatit francez ka arritur fitoren e shtatë në nëntë javë të veprimtarisë, e të katërtën radhazi.
Nisë nuk është ndaluar dot as nga Olimpiku i Lionit, një prej skuadrave më të mira franceze. Ekipi ku militon Mario Balotelli ka fituar 2-0 ndaj Lionit.
Epërsia ka ardhur shpejt, në minutën e 5-të, kur ka shënuar Baysse. Gjërat për vendasit do të bëheshin më të lehta teksa miqtë do të mbeteshin me dhjetë lojtarë. Fekir do të dilte me të kuqe në minutën e 28-të.
Goli i dytë vjen për Nisën me të nisur çerekorëshi i fundit i lojës. Pas këtij goli, të realizuar nga Seri, Balotelli humb një 11-metërsh, që do ta kishte thelluar rezultatin.
Fitorja ndaj Lionit i mundëson Nisës një kryesim të qetë në kampionat, me 23 pikë.
Monako kishte mundësi të mos e linte Nisën të shkëputej, por në një takim të luajtur më herët se ai i kryesuesve humbi në fushën e Tuluzës.
Tuluza fitoi 3-1 ndaj Monakos, me ç’rast dhe u ngjit në vend të tretë në renditje.
Vendasit e nisën keq takimin, duke u gjendur në humbje që në minutën e tretë. Revanshi i tyre do të vinte në pjesën e dytë, kur dhe shënuan tre gola.
Monako dhe Tuluzë pasojnë Nisën në klasifikimin e përgjithshëm. /tesheshi.com/
