Siç ishte paralajmëruar nga “TeSheshi.com”, ka nisur vala e sulmeve brenda Partisë Demokratike nga deputetët ndaj Bashës dhe vendimit të tij për bojkotin e zgjedhjeve të ardhshme. Pakënaqësitë e para kanë dalë sheshit dhe tre deputetë që i janë kundërvënë vendimit të Bashës janë Eduart Selami, Jozefina Topalli dhe Majlinda Bregu.
Ish-kreu i demokratëve, Eduard Selami në një intervistë për Zërin e Amerikës e ka cilësuar si mjaft të dëmshme vendimin e Lulzim Bashës për të mos hyrë në zgjedhjet e 18 qershorit.
“Kam vënë re që z.Basha e përdori çadrën jo më për një protestë paqësore por fatkeqësisht, me një retorikë populiste dhe me një gjuhë të papërshtatshme e përdori për të anashkaluar institucionet dhe me keq akoma, për të bojkotuar Parlamentin në një moment shumë të rëndësishëm siç është reforma në drejtësi që është e lidhur me rrugën integruese të Shqipërisë në Europë. Dhe më tej akoma në një retorikë të paprecedentë për të bllokuar dhe për të mos marrë pjesë në zgjedhje e cila është mjaft e dëmshme për Shqipërinë dhe për Partinë Demokratike”, – është shprehur Selami.
Nga ana tjetër, ka qenë Jozefina Topalli ajo që thotë se ka kërkuar prej një jave mbledhjen e grupit parlamentar për të diskutuar në lidhje me vendimin për pjesëmarrjen apo jo në zgjedhje.
“Kam kërkuar prej të paktën 1 jave mbledhjen e grupit parlamentar të PD-së për të diskutuar se çfarë do të bëhet me pjesëmarrjen në zgjedhje si dhe për t’u njohur me kostot e bojkotit që lidershipi i PD ka vendosur në raport me zgjedhjet”, – tha Topalli në një prononcim për BalkanWeb.
Nga ana tjetër, nënjë postim në Facebook, ka qenë Majlind Bregu e para që i ka dalë hapur kundër vendimit të Bashës, duke i kujtuar atij edhe rekomandimin e miqve të PPE-së, të cilët ndër të tjera janë shprehur “nuk ju ndihmojmë dot më, sepse ju nuk doni të ndihmoni veten”. Bregu e ka lexuar mesazhin e ndërkombëtarëve si një detyrim që PD ka ndaj qytetarëve për të qenë në Parlament dhe për të marrë pjesë në zgjedhje.
“Kam heshtur këto kohë publikisht dhe jam përpjekur me mish e me shpirt ta ndihmoj PD-në dhe Lulzim Bashën duke u përpjekur t’i bind miqtë tanë të PPE të na vijnë sërish në ndihmë. Por sot nuk mund të hesht më sepse edhe vetë ata që kurrë s’na kanë lënë vetëm më parë, që nga Presidenti Daul e deri tek i fundit në PPE, më përsërisin prej disa ditësh: “Na vjen keq po mesa duket nuk ju ndihmojmë dot më, sepse ju nuk doni të ndihmoni veten!”
Ata duan që PD të hyjë në zgjedhje! Ata duan që ne të jemi në parlament! Ata duan që të kthehemi menjëherë në Kuvend dhe të votojmë të gjitha ato që duhen për zgjedhjet e për reformën në drejtësi!
Dhe unë jam e bindur që Shqipëria bëhet më europiane me zgjedhje të lira e të ndershme dhe jo me rrëmujë të cilën s’na e ka borxh asnjë qytetar i këtij vendi!”- ka thënë më herët Bregu./tesheshi.com/
