Hyrja në fuqi e Kodit të ri të Procedurës Penale ka sjellë ndryshime të rëndësishme që i hapin rrugën Prokurorisë Speciale dhe hetimeve të zyrtarëve të lartë.
Që prej ditës së djeshme, të gjitha dosjet në ngarkim të gjithë zyrtarëve që i kanë ato në Prokurori, janë transferuar tek Krimet e Rënda, e cila automatikisht kthehet në Prokurori Speciale.
Nuk bëhet fjalë vetëm për deputetët, por edhe për zyrtarët e nivelit të dytë dhe të tretë, që janë denoncuar gjithë këto vite nga raportet e Kontrollit të Lartë të Shtetit.
Që prej ditës së djeshme, për shembull, dosja në ngarkim të deputetit Tom Doshi kalon tek krimet e rënda.
Pa ashtu transferohet dosja e tmerrshme e CEZ- DIA, që pritet të “përvëlojë” sfera shumë të larta, dosja e “21 janarit”, por edhe të tjera që janë krijuar nga materialet e KLSH-së.
Gjykata e Lartë nuk do të jetë më shkalla ku do të gjykohen anëtarët e Parlamentit.
Vetë ky institucion është katandisur në një gjendje amullie si pasojë e nisjes së vettingut, mbarimit të mandatit të disa anëtarëve, por edhe largimit të një trupe administrative.
Vetë Gjykata e Lartë njoftoi se 5 gjyqtarëve iu mbaroi mandati 9-vjeçar. Kushtetuta parashikon mundësinë e qëndrimit të tyre në detyrë deri në momentin e zëvendësimit, por katër anëtarë, Guxim Zenelaj, Aleksandër Muskaj, Evelina Qirjako, dhe Arjana Fullani kanë vendosur që të dorëzojnë detyrën.
Vetëm gjyqtari Andi Çeliku ka zgjedhur që të qëndrojë pavarësisht mbarimit të mandatit.
Gjykata e Lartë ka sipas ligjit 19 anëtarë. Aktualisht ajo funksionon me 14 gjyqtarë, ndër të cilët anëtarja Majlinda Andrea është në procedura shkarkimi pas dënimit të saj për korrupsion. Dorëzimi i detyrës nga 4 anëtarët e tjerë e çon në 9 numrin e gjykatësve që ushtrojnë aktivitetin, pa llogaritur kryetarin Xhezair Zaganjori.
Në muajt që vijnë, Gjykata e cila ka në shqyrtim afër 19 mijë dosje, do të funksionojnë vetëm me gjysmën e anëtarëve të saj, ndërkohë që plotësimi i vendeve vakante, është në varësi të ngritjes së institucioneve të reja të parashikuara nga reforma në drejtësi.
Gjykata dhe Prokuroria e Krimeve të Rënda, tashmë ka emërtimin “Speciale” dhe së shpejti ajo do të funksionojnë si një trupë me autonomi të plotë hetimore.
Pra, çdo prokuror special do të vendosë vetë për të trajtuar një dosje, pa lejen apo firmën e shefit të tij, apo të Kryeprokurorit të Republikës.
Prokurori i Përgjithshëm, Adriatik Llalla, ka thirrur para disa ditësh drejtuesit e prokurorive në rrethe, të cilëve u ka komunikuar nisjen e transferimit të dosjeve.
Gjatë takimit prokurorët kanë diskutuar se si do veprojnë prokuroritë e rretheve por edhe Prokuroria e Krimeve të Rënda, për rastet dhe veprat penale që i ka parashikuar kodi i ri i procedurës penale.
Disa dosje në lidhje me trafiqet, gjithsesi do të mbeten ende në suazë të rretheve.
Do jenë pikërisht këto struktura që do hetojnë veprën penale të trafikut të narkotikëve dhe njëkohësisht do jenë këto prokurori që paralelisht do regjistrojnë dhe hetimin pasuror për personin e arrestuar; pra për shpërndarësit e vegjël dhe kultivuesit e lëndëve narkotike, dosjet do të hapen nga prokuroritë e rretheve. Transferimi bëhet në Prokurorinë Speciale, vetëm kur të zbardhet mekanizmi i organizatës kriminale të strukturuar.
Burime diplomatike i thanë tesheshi.com se nga të parët që do të nisin vettingun së bashku me krerët e drejtësisë, do të jetë dhe një grup prokurorësh dhe gjykatësish të Krimeve të Rënda, që në të shkuarën janë mënjanuar pikërisht kur kanë nisur të hetojnë dosje të mëdha.
Në listën për të hyrë në SPAK është edhe grupi i Task-Forcës me në krye Dritan Rreshkën, që pas trajnimit në SHBA u mënjanuan nga ish-Presidenti Nishani dhe Kryeprokurori Llalla. /tesheshi.com/
