Nga Ylli Pata
Një grup i nivelit të lartë prokurorësh nga SHBA dhe vendeve të BE-së do të punojnë si këshilltarë në Ministrinë e Drejtësisë, menjëherë pas instalimit të qeverisë së re, e cila pritet të marrë votbesimin në ditët e para të shtatorit.
Burime diplomatike i thanë tesheshi.com se “përveç vettingut dhe procesit të riformatimit të sistemit të drejtësisë, një program i rëndësishëm që mbështetet nga ndërkombëtarët është edhe mbrojtja e dëshmitarëve”.
Bëhet fjalë për një program me një fond shumë të zgjeruar, i cili do të mbulohet si nga qeveria shqiptare ashtu dhe nga Bashkimi Europian.
Sasia e këtij fondi ende nuk është përcaktuar, pasi do të varet nga rastet që do të ofrohen për të nisur një operacion të madh që pritet të hetojë zyrtarë të lartë dhe politikanë.
Aktualisht, në Ministrinë e Brendshme ekziston një seksion për mbrojtjen e dëshmitarëve, i cili ka si pjesëtarë ish-pjesëtarët e forcave speciale të quajtura si “Brisku”. Në drejtim të këtij grupi është emëruar ish-numri dy i policisë shqiptare, Ardian Çipa.
Pritet që ky seksion të kalojë në varësi të Ministrisë së Drejtësisë dhe të mos jetë thjesht një grup i vogël që shoqëron dëshmitarët e drejtësisë, por një drejtori e vërtetë që do të ketë disa sektorë.
Struktura e mbrojtjes së dëshmitarëve do të ketë:
-departamentin e ruajtjes së fshehtë
-departamentin e shoqërimit
-departamentin e strehimit të dëshmitarëve
Departamenti i parë do të jetë një lloj “shërbimi sekret” që do të marrë informacione dhe të ndjekë dëshmitarët e drejtësisë dhe kërcënimet që mund t’i vijnë nga subjektet që ata kanë denoncuar.
Departamenti i shoqërimit do të funksionojë siç tani, pra do të merret me ruajtjen fizike e përcjelljes së dëshmitarëve dhe familjarëve të tyre.
Ndërkaq, struktura e tretë do të jetë më shumë logjistike pasi do të bëjë lëvizjen në vende sekrete të dëshmitarëve, duke iu siguruar jetesën, futjen në punë, dhe natyrisht banesën.
Fondi i kësaj pjese që mendohet të jetë i lartë do të paguhet nga qeveritë e vendeve europiane ku do të zhvendosen dëshmitarët.
Modeli është i aplikuar me dëshmitarët e UNMIK-ut apo EULEX-it në Kosovë.
Pra, në momentin që një dëshmitar pranon të bashkëpunojë me drejtësinë, bëhet vlerësimi i rëndësisë së dëshmisë së tij, dhe nëse vlerësohet si “me peshë”, atëherë ai transferohet me familjen e tij në një vend të BE-së, qeveria e të cilit kujdeset me një banesë sekrete, si dhe do t’i paguajë të gjitha shpenzimet e jetesës për vete dhe familjen.
Siç mësohet, në këtë kategori nuk do të jenë vetëm dëshmitarët që pranojnë të bashëpunojnë me shënjestër politikanët apo zyrtarët e korruptuar apo të përfshirë në krime, por edhe ata që kanë në fokus bandat shqiptare të drogës që tashmë janë kthyer në organizata të fuqishme kriminale në disa vende të Europës.
Aktualisht i vetmi dëshmitar i drejtësisë është Adriatik Coli, me dëshminë e të cilit u dënua Lul Berisha dhe Indrit Dokle, pjesëtarë të të ashtuquajturës “Bandë e Durrësit”.
Ndërkaq, Romeo Kara, ish-punonjësi i DIA-s i cili ka marrë përsipër të denoncojë vetë aferën e privatizimit dhe borxhet e OSHE-së, edhe pse ka prekur nivele të larta të politikës, duke nisur nga i biri i ish-kryeministrit Sali Berisha, Shkëlzeni, apo dhe vetë presidentin e Republikës, Ilir Meta, nuk është pranuar si dëshmitar me letra, duke rrezikuar kështu jetën e tij dhe të familjes.
Megjithatë ai çdo ditë nëpërmjet mediave dhe rrjeteve sociale furnizon publikun me ato që di mbi këtë aferë.
Nëse pranohet dëshmitar, ky ish-bashkëpunëtor i Kastriot Ismailajt, atëherë pritet që të gjitha deklaratat e tij të marrin formë zyrtare dhe si të tillë të përfshihen dhe në një hetim zyrtar. Natyrisht kundër atyre zyrtarëve që ai akuzon. /tesheshi.com/
