Korriku ka shënuar edhe hapjen e sezonit të zjarreve në pyje për shkak të temperaturave të larta që në disa qytete kanë kapur shifra deri në 39 gradë Celsius. Ministria e Mjedisit me anë të një njoftimi, vuri në dukje se janë djegur deri më tani 10 hektarë pyje dhe 26 hektarë kullota.
Si pothuajse cdo vit, vera është koha kur bashkë me temperaturat e larta në dëm të pyjeve e kullotave dalin edhe banorët e zonave përkatëse të cilët u vënë flakën kullotave me qëllim hapjen e tokës bujqësore.
Ndërkaq, autoritetet thonë se kanë një plan masash për të parandaluar zjarrvënien e qëllimshme në pyje e kullota dhe për të minimizuar dëmet nga zjarret që nisin nga I nxehti. Sipas ministrit të Mjedisit, Lefter Koka banorët do të ndiqen penalisht nëse verifikohet se kanë ndezur zjarre të qëllimshme.
Ndërsa në bashkë bashkëpunim me Ministrinë e Brendshme plani parashikon angazhimin e shtabeve lokale dhe aktivizimin e sistemeve vrojtuese. 110 vrojtues nga Inspektorati i Mjedisit, Agjencia Kombëtare e Mjedisit dhe struktura të tjera janë aktivizuar për monitorimin e situatës. /tesheshi/
