Pa asnjë kamuflim politik, kryeministri Edi Rama godet nëj ndër porcionet më të mëdha dhe më të shijshme të LSI-së tepsinë e pushtetit: Hipotekat!
“Ju ftoj të gjithëve të jepni dorëheqjen brenda 24 orëve, të largoheni me dinjitet. Nëse doni t’i jepni vetes një mundësi dhe të dilni me dinjitetin minimal, jepni dorëheqjen”, u tha Rama drejtuesve vendorë të Hipotekave, duke e quajtur këtë strukturë si një nga pjesët më të prekura të të të quajturit prej tij si “sistem kanceroz i tepsisë së partive të pushtetit”.
“Dorëheqja e të gjithë regjistruesve pa dallim përkatësish partiake dhe shpallja e kërkesës publike për kandidatë, për pozicionin e regjistruesit në çdo bashki, është vetëm hapi fillestar në rrugën e një reforme rrënjësore për të bërë shtet në hipotekë”, tha Rama.
Sipas tij, një ere e re e pret këtë strukturë, ndër më raskapitëset për njerëzit e thjeshtë, sapo të formohet qeveria e re, kur tha:
“Do të jetë ngritja e Agjencisë Kombëtare të Titujve të Pronësisë dhe synimi është që më herët sesa vonë, brenda këtij mandati, certifikata e pronës të mundësohet automatikisht nga regjistri kombëtar dixhital i pronës, jo më për javë, muaj e vite, po në pak minuta”.
Siç dihet, në mandatin e parë 4-vjeçar, Hipotekat iu lanë LSI-së në atë që sot quhet tepsi e deri dje aleancë strategjike. /tesheshi.com/
