Një ndërprerje e shkurtër e luftimeve ka nisur sot në Halep, duke filluar nga ora nëntë e mëngjesit e gjer në 19:00 të mbrëmjes.
Armëpushimi i ndërmarrë nga forcat ruse dhe ato qeveritare siriane synon t’u japë mundësi kryengritësve dhe civilëve të largohen nga zonat e rrethuara.
Shefi i shtabit të përgjithshëm rus, Valery Gerasimov, do të deklaronte dy ditë më parë se, “Për të shmangur viktimat e panevojshme, ministri i Mbrojtjes, Sergey Shoigu, ka deklaruar pauzën humanitare në Halep me një urdhër të kryekomandantit Vladimir Putin.”
Sipas Gerasimov-it, nga dy korridoret e hapura për militantët, njëri të çon në kufirin turko-sirian, e tjetri në Idlib.
Rusia deklaron se kjo do të jetë mundësia e fundit që kryengritësit ta lënë pjesën lindore të qytetit.
Por thirrjet e rusëve nuk janë dëgjuar, pasi kryengritësit e kanë refuzuar ofertën për t’u larguar dhe e kanë vazhduar kundërsulmin për të çarë rrethimin.
Një tjetër ndërprerje e njëanshme e luftimeve në tetor do të përfundonte pa largimin e thuajse askujt nga qyteti tashmë i rrënuar nga lufta. /tesheshi.com/
