Sot pritet nisja e një raundi të ri bisedimesh për paqen në Siri, që do të jenë të dytat që prej marrëveshjes për ndalimin e luftimeve, të respektuar në përgjithësi që nga 27 shkurti.
Bisedimet do të përqendrohen më së shumti te tranzicioni politik, te qeverisja dhe parimet kushtetuese, siç lajmëroi dhe i dërguari i posaçëm i OKB-së për Sirinë, Staffan de Mistura.
De Mistura qe ditën e djeshme për bisedime në Iran, ndërsa i cilëson me rëndësi kritike negociatat. Një pikë ku bisedimet kanë ngecur është ajo e fatit të Beshar Esadit, për çka përfaqësuesit e regjimit sirian në negociata nuk pranojnë të bisedojnë.
Edhe pse do të ketë bisedime në Gjenevë, qeveria siriane do të vijojë me zgjedhjet parlamentare këtë të mërkurë në zonat e kontrolluara prej saj. OKB-ja nuk e njeh këtë votim, i cili është cilësuar si i jashtëligjshëm dhe nga kundërshtarët e regjimit brenda e jashtë vendit.
Ndërkohë, në Halep ka patur luftime. Forcat siriane të regjimit kanë kryer gjatë ditëve të fundit sulme ajrore mbi pjesën lindore të Halepit, të kontrolluar nga rebelët. Autoritetet e Uashingtonit kanë shprehur shqetësimin se përshkallëzimi i sulmeve mund të çojë në ndërprerje të armëpushimit. /tesheshi.com/
