Në të gdhirë të së martës ka nisur evakuimi i kampit të refugjatëve të Idomenit në Greqi, në kufi me Maqedoninë. Autoritetet greke kanë bllokuar të gjitha rrugët që të çojnë në të, si dhe kanë dërguar më tepër se 400 forca policore.
Dy orë pas nisjes së operacionit janë larguar gjashtë autobusët e parë, me 340 refugjatë brenda tyre, duke u drejtuar për në një kamp të ri refugjatësh pranë Selanikut.
Kampi i refugjatëve të Idomenit u ka bërë vend më tepër se 14.000 personave në kulmin e krizës, kur Maqedonia mbylli kufirin në mars, por ky numër ka rënë me kalimin e kohës, e shumë prej tyre kanë pranuar të largohen për në vendstrehime të tjera. 8.400 persona gjenden në të aktualisht, duke përfshirë qindra fëmijë. Pjesa dërrmuese e refugjatëve janë nga Siria, Iraku dhe Afganistani.
Sipas zëdhënësit të qeverisë greke, policia nuk ka për të përdorur forcën, ndërkohë që operacioni për zbrazjen e kampit do të zgjasë nga një javë gjer në dhjetë ditë.
Si autoritetet qeverisëse, ashtu dhe policia, kanë njoftuar se banorët e kampit do të zhvendosen në kampe të tjera tërësisht të reja.
Ndërsa shumë prej refugjatëve shpresojnë se kampet zyrtare do t’u ofrojnë kushte më të mira qëndrimi, një pjesë tjetër tregohet ngurruese, me frikën se kjo do ta shtyjë risistemimin e tyre në vendet e tjera europiane.
Pak prej të mbërriturve në Greqi kërkojnë azil aty, duke synuar të mbërrijnë në vende si Gjermania apo Suedia. /tesheshi.com/
