Takimi dyditor i Organizatës së Bashkëpunimit Islam i fillon sot punimet në metropolin turk të Stambollit me pjesëmarrjen e më tepër se 30 kryetarë shtetesh apo qeverish.
Mes të ftuarve në këtë samit janë mbreti Selman i Arabi Saudite, që gjendet prej së hënës në Turqi, si dhe presidenti iranian Hasan Ruhani. Dy figurat përfaqësojnë dy shtete që prej muajsh i kanë mes tyre marrëdhëniet të tensionuara, e që gjenden në pozita krejt të kundërta në qëndrimin ndaj krizës jemenase dhe siriane.
Nga të munguarit në këtë takim do të jetë presidenti egjiptian Abdulfettah es-Sisi. Do të mungojë gjithashtu dhe mbreti i Jordanisë, Abdullah.
Kriza siriane dhe terrorizmi do të zënë një vend kryesor në takimin dyditor.
Siç deklarohet dhen nga presidenti turk, Rexhep Tajjip Erdogan, në takim do të vihet theksi te uniteti dhe solidariteti mes muslimanëve.
“Në një kohë kur bota islame përballet me sfidat më serioze, udhëheqësit muslimanët duhet të tregojnë unitet dhe solidaritet për të inkurajuar drejtësinë dhe paqen.”
Turqia synon që gjatë kohës që do ta drejtojë organizatën të nxisë bashkëpunimin mes vendeve muslimane.
Një problem tjetër veç terrorizmit e sektarizmit që do të marrë vëmendje gjatë drejtimit të organizatës nga Turqia, siç lajmëron dhe presidenti turk, janë dhe sfidat me të cilat ndeshen pakicat muslimane kudo në botë.
Sipas Erdoganit, plani i veprimit që shpresohet të miratohet në këtë takim, ka për të identifikuar objektivat e organizatës për dekadën e ardhshme.
“Udhëheqësit e botës islame takohen në një kohë të vështirë për ummetin. Sfidat janë të mëdha, por nuk ka dyshim se ne do t’ia dalim me lejen e Allahut dhe me punën e madhe të vëllezërve dhe të motrave muslimane,” shprehet Rexhep Tajjip Erdogan. /tesheshi.com/
