Në Rusi nisi “Lindje 2018”, stërvitja më e madhe ushtarake në 37 vitet e fundit, ku do të marrin pjesë rreth 300,000 trupa.
“Lindje 2018” do të mbahet deri më 17 shtator, nën drejtimin e ministrit të Mbrojtjes të Rusisë, Sergei Shoigu, në Lindjen e Largët dhe në ujërat e Oqeanit Paqësor, raportojnë mediat.
Pos 300.000 trupave, në të janë angazhuar më shumë se 1.000 avionë, helikopterë dhe avionë pa pilot, 36.000 automjete të blinduara dhe 80 luftëanije.
Në një fazë, do të ketë edhe njësi nga Kina dhe Mongolia.
“Lindje 2018” do të mbahet larg nga kufijtë e NATO-s dhe në asnjë mënyrë nuk do të ndikojë në sigurinë e tyre, tha zëdhënësja e Ministrisë së Punëve të Jashtme të Rusisë, Maria Zakharova.
Siç tha ajo, të gjitha pretendimet që Rusia po përgatitet për një konflikt të armatosur janë të pabazuara. /tesheshi.com/
