Starton këtë të shtunë aktiviteti më i rëndësishëm futbollistik i kësaj vere, Kupa e Konfederatave, e bërë traditë si një provë gjenerale një vit para zhvillimit të një Botërori.
Tetë janë përfaqësueset që marrin pjesë në këtë veprimtari, duke filluar me Rusinë, si vend organizator, e me Gjermaninë, fituesen e Kupës së Botës së tre viteve më parë.
Larminë e skuadrave nga të gjitha kontinentet e plotësojnë Kameruni, Australia, Portugalia, Meksika, Zelanda e Re dhe Kili.
Ekipet përfaqësuese janë të ndara në dy grupe, në atë A, ku gjenden Meksika, Zelanda e Re, Potugalia dhe Rusia, dhe në atë B, të përbërë nga Australia, Kameruni, Kili dhe Gjermania.
Ndeshja hapëse është ajo e orës 17:00, në Shën Petërsburg, mes Rusisë dhe Zelandës së Re.
Mes statistikave spikat përbërja e Rusisë me të gjithë lojtarët nga kampionati vendas, ndryshe Kamerunit, që, në të kundërt, ka një përbërje të tërë me lojtarë të cilët luajnë jashtë vendit.
Lojtari më në moshë i Kupës së Konfederatave të 2017-s do të jetë meksikani Rafa Marquez, ish-mbrojtësi i Barcelonës, që është saktësisht 38 vjeç e katër muaj.
Kili do të ketë skuadrën me moshën mesatare më të lartë në një aktivitet të tillë, 29 vjeç dhe një muaj. Ndryshe ngjet me Gjermaninë, që do të ketë përfaqësuesen me moshën më të re mesatare, 24 vjeç e katër muaj.
Brazili është ekipi më i suksesshëm i Kupës së Konfederatave, me katër tituj të fituar, në vitet 1997, 2005, 2009 dhe 2013. Franca, ndërkaq, është e vetmja mes përfaqësueseve të tjera që e ka fituar më shumë se një herë trofeun, në 2001-shin dhe në 2003-shin.
Për herë të parë do të ketë tre ekipe nga një e njëjta konfederatë. Europa do të përfaqësohet kështu me Rusinë, si pritëse, me Gjermaninë, si kampione e botës, e me Portugalinë, si fituese e Europianit. /tesheshi.com/
