Dy persona të paidentifikuar kanë qëlluar sot në mëngjes me armë zjarri drejt konsullatës amerikane në Stamboll, e cila ndodhet në lagjen Sarëjer. Forcat e sigurisë së objektit i janë përgjigjur zjarrit, e për pasojë është plagosur një prej mësymësve, që ka qenë një femër, e kapur më pas në një shtëpi aty pranë. Po vijojnë kërkimet për të kapur personin tjetër, që mendohet të jetë mashkull.
Fatmirësisht, nuk ka njoftime për të lënduar.
Ky incident vjen vetëm pak orë pas një sulmi me bombë në një stacion policor në Sulltanbejli, po në Stamboll, ku mbetën dhjetë të plagosur, duke përfshirë shtatë policë. Sulmi shkaktoi një zjarr që solli shembjen e një pjese të një ndërtese.
Në vendin e ngjarjes ka patur më pas përplasje mes forcave policore dhe terroristëve. Mësohet se një polic ka humbur jetën, e po ashtu dy prej terroristëve.
Turqia është përfshirë prej një muaji nga një valë incidentesh. Rigjallërimi i aktivitetit terrorist të PKK-së ka prishur qetësinë e gjatë të vendit euroaziatik. Një front tjetër i hapur për forcat ushtarake turke është ISIS-i. Avionët turq kanë bombarduar gjatë ditëve të fundit bazat e luftëtarëve të PKK-së dhe të ISIS-it në Siri dhe Irak.
Sulmet e PKK-së që prej fillimit të korrikut kanë marrë 26 jetë njerëzish në Turqi, si dhe kanë lënë dhjetëra të plagosur. Në anën tjetër, pretendohet se prej sulmeve ajrore të avionëve turq në veri të Irakut kanë mbetur të vrarë së paku 390 militantë të PKK-së. /tesheshi.com/
