Republika e Kosovës nga sot ka nisur implementimin e marrëveshjes së Stabilizim-Asociiimit lidhur me Bashkimin Evropian. Kryeministri i Kosovës, Isa Mustafa me këtë rast tha se sot po fillon një kapitull i ri i zhvillimit.
“Pas nënshkrimit të MSA-së, më 27 tetor të vitit 2015, sot Kosova po kalon në një fazë tjetër të zhvillimit politik, social dhe ekonomik. Në këtë moment edhe zyrtarisht po fillojmë me implementimin e Marrëveshjes së Stabilizim Asociimit. Me hyrjen në fuqi të Marrëveshjes së Stabilizim Asociimit, Kosova po vë gurthemelin e marrëdhënieve kontraktuale me BE, që kushtëzon të drejta dhe obligime reciproke në një spektër të gjerë sektorësh, duke përfshirë respektimin e parimeve demokratike, aplikimin e standardeve evropiane të tregut, konkurrencës, shtetin ligjor dhe pronën e përgjithshme dhe atë intelektuale”, ka thënë Mustafa.
Sipas tij, marrëdhëniet kontraktuale me BE-në do të ndihmojnë në adoptimin e standardeve evropiane, në avancimin e dialogut politik, në përmirësimin e standardeve të edukimit, punësimit, energjisë dhe ambientit, forcimin e shtetit ligjor dhe rritjen e efiçiencës së qeverisjes së brendshme.
Ndërsa, Lulzim Rafuna, Drejtor i Doganave të Kosovës ka thënë se kjo është një ëndërr e kamotshme e bërë realitet.
“Stafi i doganës do të jetë në nivel të detyrës për zbatimin e kësaj marrëveshje”, ka thënë Rafuna./tesheshi.com/
